صحت مند غذا اور ورزش سے نیند میں بہتری: تحقیق

نئے سال کے آغاز پر جہاں لاکھوں افراد صحت مند غذا اور جسمانی فٹنس کو اپنا ہدف بناتے ہیں، نئی تحقیق سے معلوم ہوا ہے کہ یہ عادات نہ صرف جسمانی صحت بلکہ بہتر اور پُرسکون نیند میں بھی مددگار ہیں۔

 ماہرین کے مطابق اچھی غذا اور باقاعدہ ورزش نیند کے معیار کو بہتر بنانے کے مؤثر ذرائع ہیں۔

امریکن اکیڈمی آف سلیپ میڈیسن کی تازہ رپورٹ کے مطابق صحت مند غذا اور جسمانی سرگرمی بہتر نیند کے حصول میں اہم کردار ادا کرتی ہیں۔

 اکیڈمی کے 2025 کے سلیپ پرائرٹائزیشن سروے میں امریکا کے 2007 بالغ افراد سے رائے لی گئی، جس میں 59 فیصد نے کہا کہ متوازن غذا ان کی نیند بہتر بناتی ہے، 42 فیصد نے صبح کی ورزش، اور 46 فیصد نے شام کی ورزش کو فائدہ مند قرار دیا۔

اکیڈمی کی ترجمان ڈاکٹر کن یوئن کے مطابق نیند صحت مند طرزِ زندگی کے تین بنیادی ستونوں میں سے ایک ہے، جن میں متوازن غذا اور باقاعدہ ورزش بھی شامل ہیں۔

اکثر نئے سال کے عزم صرف وزن یا ورزش تک محدود رہتے ہیں، مگر یہ عادات نیند سمیت مجموعی صحت کو بھی بہتر بناتی ہیں۔

تحقیق میں خاص طور پر 25 سے 34 سال کی عمر کے افراد نے اعتراف کیا کہ صحت مند غذا اور ورزش نے ان کی نیند پر مثبت اثر ڈالا۔

 ماہرین کے مطابق مناسب نیند نہ صرف تازگی کا احساس دیتی ہے بلکہ موٹاپے، دل کی بیماری، ڈپریشن اور بے چینی جیسے دائمی امراض کے خطرات کو بھی کم کرتی ہے۔

امریکن اکیڈمی نے بہتر نیند کے لیے عملی تجاویز بھی دی ہیں، جن میں روزانہ ایک ہی وقت سونے کی عادت، کم از کم سات گھنٹے نیند، پسندیدہ جسمانی سرگرمی اپنانا، صحت بخش غذا کا استعمال، اور سونے سے پہلے موبائل فون یا کمپیوٹر سے پرہیز شامل ہیں۔ 

ماہرین کا کہنا ہے کہ نیند کو ترجیح دینے سے نئے سال کے عزم زیادہ دیرپا اور مؤثر ثابت ہو سکتے ہیں۔