کہیں بارش، کہیں برفباری: ملک بھر میں موسم کے دلکش رنگ، سردی میں اضافہ

ملک کے مختلف حصوں میں بادل، بارش اور برفباری نے موسم کو حسین بنا دیا ہے، جبکہ سردی کی شدت میں نمایاں اضافہ دیکھنے میں آیا ہے۔ شہرِ قائد کراچی میں رات گئے موسمِ سرما کی پہلی بارش ہوئی، جس کے بعد سردی کی لہر تیز ہو گئی۔

کراچی کے آئی آئی چندریگر روڈ، پی آئی ڈی سی، سلطان آباد، ضیاء الدین احمد روڈ، سول لائنز، شاہراہ فیصل، طارق روڈ، صدر، سولجر بازار، جمشید روڈ، سائٹ ایریا، میٹروول اور اورنگی ٹاؤن سمیت مختلف علاقوں میں کہیں ہلکی اور کہیں تیز بارش ریکارڈ کی گئی۔

 محکمہ موسمیات کے مطابق شہر میں آج بھی وقفے وقفے سے بوندا باندی اور ہلکی بارش کا امکان ہے، جس سے درجہ حرارت مزید کم ہو سکتا ہے۔

سندھ کے دیگر شہروں لاڑکانہ، سکھر، شکار پور، جیکب آباد، نوڈیرو، خانپور، لکھی غلام شاہ اور گڑھی یاسین میں بھی بارش ہوئی، جبکہ حیدرآباد میں وقفے وقفے سے بادل برستے رہے۔ کئی علاقوں میں فیڈرز ٹرپ ہونے کے باعث بجلی کی فراہمی متاثر ہوئی۔

پنجاب کے مختلف علاقوں میں بھی بارش ہوئی، جبکہ لاہور میں آج اور کل بارش کی پیشگوئی کی گئی ہے۔ بلوچستان میں کوئٹہ، چمن اور گوادر میں بارش سے سردی میں اضافہ ہوا، جبکہ توبہ اچکزئی کے بالائی علاقوں میں برفباری ہوئی۔

 چمن اور گردونواح میں بارش کے باعث ندی نالوں میں طغیانی آ گئی اور بعض مقامات پر سیلابی پانی آبادی میں داخل ہو گیا۔

خیبرپختونخوا اور گلگت بلتستان کے مختلف علاقوں میں بھی بارش اور برفباری کا سلسلہ جاری رہا۔

 رزمک، شوال، وانا، برمل اور شکئی کے بالائی علاقوں میں برفباری ہوئی، جبکہ دیامر اور بابوسر ٹاپ پر برف پڑنے سے رابطہ سڑکیں بند ہو گئیں۔ وادی نیلم، اڑنگ کیل، گریس ویلی اور تاؤ بٹ میں بھی برفباری سے سرد ہواؤں کا راج رہا۔