پاکستان میں 2026 کا پہلا سورج نئی امیدوں اور خوشخبریوں کے ساتھ طلوع

پاکستان میں سال 2026 کا پہلا سورج نئی امیدوں، امنگوں اور روشن خوابوں کے ساتھ طلوع ہو گیا، جبکہ نشیب و فراز سے بھرپور سال 2025 یادوں کا حصہ بن گیا۔

نئے سال کا آغاز ملک بھر میں دعاؤں، بارانِ رحمت اور بہتر مستقبل کی توقعات کے ساتھ ہوا۔

 کراچی میں سال نو کا پہلا سورج صبح 7 بج کر 17 منٹ پر طلوع ہوا، جسے دیکھنے کیلئے شہری ساحلی علاقوں، پارکوں اور کھلے مقامات پر جمع ہوئے اور اس حسین لمحے کو کیمروں میں محفوظ کیا۔

ملک بھر کی مساجد میں نئے سال کے آغاز پر پاکستان کی سلامتی، استحکام اور خوشحالی کیلئے خصوصی دعائیں کی گئیں۔ 

علما اور نمازیوں نے دعا کی کہ اللہ تعالیٰ وطن عزیز کو درپیش مشکلات دور فرمائے اور پاکستان کو ترقی و امن کا گہوارہ بنائے۔

دوسری جانب راولپنڈی اور اسلام آباد میں موسلا دھار بارش کے باعث شہری نئے سال کا سورج نہ دیکھ سکے، تاہم چار ماہ کی خشک سالی کے بعد برسنے والی اس بارش کو قدرت کی بڑی نعمت اور نئے سال کی خوش آئند علامت قرار دیا جا رہا ہے۔

 گرج چمک کے ساتھ ہونے والی بارش سے شہر دھل گئے، درخت نکھر گئے اور فضا میں تازگی پھیل گئی۔

بارش کے باوجود جڑواں شہروں کی مساجد اور امام بارگاہوں میں نمازِ فجر باجماعت ادا کی گئی، جہاں پاکستان کے روشن مستقبل کیلئے خصوصی دعائیں مانگی گئیں۔

نئے سال کے پہلے دن عوام کیلئے دو بڑی خوشخبریاں بھی سامنے آئیں، پٹرول اور ڈیزل کی قیمتوں میں دس روپے تک کمی کو عوام کیلئے بڑا ریلیف قرار دیا جا رہا ہے، جبکہ خشک سالی کے بعد بارش کو دوسری اہم خوشخبری کہا جا رہا ہے۔

لاہور سمیت پنجاب کے مختلف علاقوں میں ابر آلود موسم اور شدید دھند کے باعث نئے سال کا سورج پوری طرح نمودار نہ ہو سکا۔

 لاہور میں طلوعِ آفتاب کا وقت صبح 7 بج کر 1 منٹ تھا، تاہم بادل آڑے آ گئے۔ شہر کا درجہ حرارت 10 ڈگری سینٹی گریڈ ریکارڈ کیا گیا، جبکہ وقفے وقفے سے ہلکی بوندا باندی جاری رہی۔

کوئٹہ میں سال 2026 کا سورج صبح 7 بج کر 45 منٹ پر طلوع ہوا۔ مساجد میں نمازِ فجر کے بعد ملکی امن، سلامتی اور خوشحالی کیلئے دعائیں کی گئیں، شہریوں نے امید ظاہر کی کہ سال نو کی پہلی کرن ملک کیلئے بہتری کا پیغام لائے گی۔

یوں سال 2025 اپنی تلخ و شیریں یادوں کے ساتھ ماضی میں دفن ہو گیا، جبکہ 2026 ایک نئی شروعات اور روشن مستقبل کی نوید لے کر طلوع ہوا۔