نیویارک کے پہلے مسلمان میئر ظہران ممدانی نے قرآن پر حلف اٹھا لیا

امریکہ کے شہر نیویارک کے پہلے مسلمان میئر ظہران ممدانی نے قرآن پاک پر حلف اٹھا کر اپنے عہدے کا آغاز کر دیا۔

غیر ملکی میڈیا کے مطابق ظہران ممدانی نے سٹی ہال نیویارک میں حلف اٹھایا، جس کے دوران اٹارنی جنرل نیویارک لیٹیا جیم نے انہیں عہدے کا حلف دلایا۔ 

اس موقع پر ظہران ممدانی کی اہلیہ بھی موجود تھیں۔

ڈیموکریٹک پارٹی سے تعلق رکھنے والے ظہران ممدانی نے 4 نومبر 2025 کو ہونے والے میئر کے الیکشن میں 50.78 فیصد ووٹ حاصل کر کے کامیابی حاصل کی اور وہ نیویارک کے 112 ویں میئر منتخب ہوئے۔

ظہران ممدانی نیویارک کے پہلے مسلمان میئر ہیں۔ 

الیکشن سے قبل امریکی صدر ڈونلڈ ٹرمپ نے انہیں نسلی تعصب کا نشانہ بنایا تھا، تاہم الیکشن میں ریپبلکن امیدوار کی شکست کے بعد ڈونلڈ ٹرمپ نے نہ صرف انہیں مبارکباد دی بلکہ ان کے ساتھ مل کر نیویارک کی بہتری کے لیے کام کرنے کا یقین بھی دلایا۔