اے این ایف کی ملک بھر میں بڑی کارروائیاں، 268 کلوگرام سے زائد منشیات ضبط

کراچی سمیت ملک کے مختلف شہروں میں اینٹی نارکوٹکس فورس (اے این ایف) نے منشیات اسمگلنگ کے خلاف بھرپور کارروائیاں کرتے ہوئے بھاری مقدار میں منشیات برآمد کر لی ہے۔

اے این ایف کے ترجمان کے مطابق پانچ مختلف کارروائیوں کے دوران مجموعی طور پر 268.08 کلوگرام منشیات ضبط کی گئی جبکہ خاتون سمیت 7 ملزمان کو گرفتار کر لیا گیا۔

یہ کارروائیاں اسلام آباد، اٹک، کوٹ مومن اور چمن میں کی گئیں، جن کے دوران 250 کلوگرام ہیروئن اور 17 کلو 500 گرام چرس برآمد ہوئی۔

ترجمان کے مطابق ایک کارروائی میں 82 کیپسولز بھی تحویل میں لیے گئے جو ہیروئن سے بھرے ہوئے تھے، جن کا مجموعی وزن 560 گرام تھا، جبکہ اس کے ساتھ 25 گرام ویڈ (Weed) بھی برآمد کی گئی۔

اے این ایف کا کہنا ہے کہ تمام گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر لیے گئے ہیں اور مزید تفتیش جاری ہے۔