واٹس ایپ ہیکنگ کے بڑھتے واقعات: پی ٹی اے نے صارفین کے لیے اہم حفاظتی ہدایات جاری کر دیں

دنیا بھر میں واٹس ایپ اکاؤنٹس ہیک ہونے کے لاکھوں واقعات رپورٹ ہو چکے ہیں جس کے باعث صارفین کو شدید سائبر خطرات کا سامنا ہے۔

 پاکستان میں بھی واٹس ایپ استعمال کرنے والوں کی تعداد بہت زیادہ ہونے کے باعث ہیکنگ کے خدشات میں اضافہ ہوا ہے۔

پاکستان ٹیلی کمیونیکیشن اتھارٹی (پی ٹی اے) نے صارفین کے لیے اکاؤنٹ کی حفاظت اور بحالی سے متعلق اہم ہدایات جاری کی ہیں۔

 پی ٹی اے کے مطابق اگر کسی صارف کا واٹس ایپ اکاؤنٹ ہیک ہو جائے تو فوری طور پر ایپ کو ڈیلیٹ کر کے دوبارہ انسٹال کریں اور اپنے موبائل نمبر سے رجسٹریشن مکمل کریں، تصدیقی کوڈ کے ذریعے اکاؤنٹ واپس حاصل کیا جا سکتا ہے۔

پی ٹی اے نے مستقبل میں ہیکنگ سے بچاؤ کے لیے ٹو اسٹیپ ویریفیکیشن فعال کرنے پر زور دیا ہے۔

 اس کے علاوہ صارفین کو مشکوک لنکس اور فائلز سے بچنے، پاس ورڈز تبدیل کرنے، اینٹی وائرس اسکین چلانے اور کسی بھی غیر معمولی سرگرمی کی صورت میں فوری طور پر واٹس ایپ سپورٹ سے رابطہ کرنے کی ہدایت کی گئی ہے۔

اتھارٹی کا کہنا ہے کہ چند سادہ احتیاطی تدابیر اپنانے سے صارفین نہ صرف اپنا ہیک شدہ اکاؤنٹ بحال کر سکتے ہیں بلکہ اپنی پرائیویسی اور ڈیٹا کو بھی محفوظ بنا سکتے ہیں۔