پاک امریکا تعلقات کی نئی بلندی: ریکوڈک میں اربوں ڈالر کی سرمایہ کاری متوقع

اسلام آباد: پاک امریکا تعلقات اس وقت اپنی تاریخ کی مضبوط ترین سطح پر ہیں، جس کے باعث پاکستان میں اربوں ڈالر کی سرمایہ کاری جلد متوقع ہے۔

میڈیا رپورٹس کے مطابق امریکی سفارت خانے کے منسٹر کاؤنسلر برائے پبلک ڈپلومیسی اینڈی ہیلس نے کہا کہ فیلڈ مارشل سید عاصم منیر، صدر ڈونلڈ ٹرمپ اور وزیراعظم شہباز شریف کے درمیان خوشگوار اور باہمی احترام پر مبنی تعلقات دونوں ممالک کے روابط کی مستحکم بنیاد کی عکاسی کرتے ہیں۔

اینڈی ہیلس نے بتایا کہ امریکی حکومت کے ایگزم بینک کے اشتراک سے ریکوڈک کے اہم معدنی منصوبے میں کئی ارب ڈالر کی سرمایہ کاری کا فیصلہ کیا گیا ہے، جبکہ مائنز اینڈ منرلز کے شعبے میں امریکی نجی کمپنیوں کی دلچسپی تیزی سے بڑھ رہی ہے۔

 انہوں نے کہا کہ سرمایہ کاری کے حتمی فیصلے نجی امریکی کمپنیوں کے اختیار میں ہیں، لیکن ریکوڈک منصوبے کے حوالے سے امریکی سفارت خانے میں غیر معمولی دلچسپی پائی جاتی ہے۔

انہوں نے کہا کہ امریکی کمپنیاں مقامی باصلاحیت افرادی قوت کو ترجیح دیتی ہیں اور روزگار کے نئے مواقع پیدا کرتی ہیں۔ 

اینڈی ہیلس نے تعلیم کو پاک امریکا تعلقات کا بنیادی ستون قرار دیتے ہوئے بتایا کہ فل برائٹ پروگرام کو پاکستان میں 75 سال مکمل ہوچکے ہیں اور اب تک 9 ہزار سے زائد پاکستانی طلبہ امریکا کی ممتاز جامعات سے تعلیم حاصل کرچکے ہیں۔

اینڈی ہیلس نے کہا کہ موجودہ تعلقات کی مضبوطی پاکستان اور امریکا کے درمیان اقتصادی، تعلیمی اور دفاعی شعبوں میں تعاون کے نئے مواقع فراہم کرتی ہے اور وہ خود اس وقت امریکی سفارت خانے میں کام کرنے پر خوش ہیں۔