پی ٹی آئی چیئرمین گوہر علی خان کا دہشت گردی کے الزامات مسترد، وفاقی حکومت سے شفاف اقدامات کا مطالبہ

اسلام آباد: پاکستان تحریک انصاف (پی ٹی آئی) کے چیئرمین بیرسٹر گوہر علی خان نے دہشت گردی کے خاتمے میں تحریک انصاف پر تعاون نہ کرنے کے الزامات کو جھوٹا اور حقیقت کے برعکس قرار دیا ہے۔

 انہوں نے پریس کانفرنس میں اُمید ظاہر کی کہ آئندہ پی ٹی آئی پر بے بنیاد الزامات نہیں لگائے جائیں گے۔

گوہر علی خان نے کہا کہ دہشت گردی کے ناسور کا خاتمہ ملک کے لیے ضروری ہے اور وہ ہر صورت اس کا خاتمہ چاہتے ہیں۔

 انہوں نے وفاقی حکومت پر زور دیا کہ صوبائی اسمبلی کو اعتماد میں لے کر ہر فیصلہ کیا جائے۔

مذاکرات کے حوالے سے بات کرتے ہوئے انہوں نے کہا کہ کسی سے کوئی مذاکرات نہیں ہو رہے، اور مذاکرات کا مینڈیٹ صرف عمران خان نے محمود اچکزئی اور علامہ ناصر عباس کو دیا ہے۔

پی ٹی آئی کے سیکرٹری جنرل سلمان اکرم راجا نے بھی وضاحت کی کہ پارٹی پر تہمت لگانا درست نہیں، پی ٹی آئی دہشت گردی کے خلاف کھڑی ہے اور لوگوں کو بے گھر نہیں دیکھنا چاہتی۔ 

انہوں نے مطالبہ کیا کہ دہشت گردی کے خلاف ایک قومی پالیسی بنائی جائے۔

پی ٹی آئی رہنما اسد قیصر نے کہا کہ وفاقی حکومت کو ہر فیصلہ کرنے سے پہلے صوبائی اسمبلی کو اعتماد میں لینا چاہیے اور اداروں اور عوام کے درمیان ہم آہنگی ضروری ہے۔