نمرہ شاہد کا کاجول سے موازنہ، اداکارہ نے مداحوں کی محبت پر کھل کر بات کر دی

پاکستانی ٹی وی اور فلم انڈسٹری کی باصلاحیت اداکارہ نمرہ شاہد نے 2016 میں اپنے فنی سفر کا آغاز کیا اور مختصر وقت میں اپنی متاثرکن اداکاری کے ذریعے ناظرین میں نمایاں مقام حاصل کر لیا۔

نمرہ شاہد ’’شاہ رُخ کی سالیاں‘‘، ’’شدت‘‘، ’’بھولی بانو‘‘، ’’ڈر خدا سے‘‘، ’’رومیو ویڈز ہیر‘‘، ’’کھٹی میٹھی لو اسٹوری‘‘ اور ’’اے مشتِ خاک‘‘ جیسے کامیاب ڈراموں میں اپنی شاندار پرفارمنس کے باعث پہچانی جاتی ہیں۔ 

حال ہی میں ڈرامہ ’’موہرا‘‘ میں ان کی اداکاری کو خوب سراہا گیا، جبکہ اس وقت وہ ڈرامہ سیریل ’’معمہ‘‘ میں آسیہ کے کردار کے ذریعے ناظرین کی توجہ حاصل کر رہی ہیں۔

اداکاری کے ساتھ ساتھ نمرہ شاہد اپنی قدرتی خوبصورتی اور پراثر آنکھوں کے باعث بھی خاصی مقبول ہیں۔

 حال ہی میں وہ نادیہ خان کے مارننگ شو میں شریک ہوئیں، جہاں انہوں نے بالی ووڈ اداکارہ کاجول سے کیے جانے والے موازنے پر کھل کر گفتگو کی۔

نمرہ شاہد کا کہنا تھا کہ ’’معمہ‘‘ کی نشریات کے بعد متعدد افراد انہیں کاجول سے مشابہ قرار دے رہے ہیں، خاص طور پر ان کی آنکھوں کی وجہ سے۔

 ان کے مطابق وہ خود نہیں جانتیں کہ یہ بات تعریف کے زمرے میں آتی ہے یا نہیں، تاہم ان کا ماننا ہے کہ ایک اداکارہ کے لیے پراثر آنکھیں ہونا ایک مثبت پہلو ہے۔

نمرہ شاہد نے اس موازنے کو خوش دلی سے قبول کرتے ہوئے مداحوں کی محبت اور پذیرائی پر ان کا شکریہ ادا کیا۔