پی پی 167 لاہور ضمنی الیکشن: پوسٹل بیلٹ کی درخواست کی آخری تاریخ 20 جنوری

لاہور: الیکشن کمیشن آف پاکستان نے اطلاع دی ہے کہ حلقہ پی پی 167 لاہور-XXII میں ہونے والے ضمنی الیکشن کے لیے پوسٹل بیلٹ کی درخواست جمع کروانے کی آخری تاریخ 20 جنوری مقرر کی گئی ہے۔

ترجمان الیکشن کمیشن کے مطابق پوسٹل بیلٹ کی سہولت سرکاری ملازمین، آرمی افسران و جوان اور ان کے اہل خانہ کے لیے دستیاب ہے۔

 اس کے علاوہ معذور افراد جو نادرا معذوری کارڈ کے حامل ہیں، بھی اس سہولت سے مستفید ہو سکتے ہیں۔

پوسٹل بیلٹ حاصل کرنے کے لیے امیدواروں کو درخواست متعلقہ ریٹرننگ آفیسر کے دفتر میں جمع کروانی ہوگی۔

 فارم الیکشن کمیشن کی ویب سائٹ سے ڈاؤن لوڈ کیا جا سکتا ہے۔ اہم بات یہ ہے کہ پوسٹل بیلٹ لینے والے ووٹر متعلقہ پولنگ اسٹیشن پر ووٹ نہیں ڈال سکتے۔

الیکشن کمیشن نے واضح کیا ہے کہ درخواست متعلقہ دفتر سے تصدیق شدہ ہونی ضروری ہے تاکہ ووٹ کے عمل میں شفافیت اور قانونی حیثیت برقرار رہے۔

اس موقع پر الیکشن کمیشن نے عوام سے اپیل کی ہے کہ وہ پوسٹل بیلٹ کے لیے مقررہ وقت کے اندر درخواست جمع کرائیں تاکہ ووٹ کا حق بروقت استعمال کیا جا سکے۔