پاک فضائیہ کے سربراہ کا دورۂ عراق، عراقی فضائیہ کی جے ایف 17 تھنڈر میں گہری دلچسپی، دفاعی تعاون مزید مضبوط بنانے پر اتفاق

پاک فضائیہ کے سربراہ ایئر چیف مارشل ظہیر احمد بابر سدھو کے سرکاری دورۂ عراق کے دوران پاکستان اور عراق کے درمیان فضائی و دفاعی تعاون کو فروغ دینے پر اتفاق کیا گیا۔

 آئی ایس پی آر کے مطابق ایئر چیف نے عراقی فضائیہ کے ہیڈکوارٹرز کا دورہ کیا جہاں انہیں گارڈ آف آنر پیش کیا گیا، بعد ازاں انہوں نے عراقی فضائیہ کے سربراہ سے ملاقات کی۔

ملاقات میں دوطرفہ دفاعی تعاون، مشترکہ تربیت، صلاحیتوں میں اضافے اور مستقبل میں تعاون کے نئے امکانات پر تفصیلی تبادلۂ خیال ہوا۔ ایئر چیف نے عراقی فضائیہ کو تربیتی شعبے میں پاک فضائیہ کے مکمل تعاون کی یقین دہانی کرائی۔

آئی ایس پی آر کے مطابق دونوں ممالک کے مذہبی، ثقافتی اور تاریخی تعلقات کو اجاگر کرتے ہوئے مشترکہ فضائی مشقوں کے انعقاد پر بھی اتفاق کیا گیا۔

 اس موقع پر عراقی ایئر چیف نے پاک فضائیہ کی پیشہ ورانہ مہارت اور آپریشنل صلاحیتوں کو سراہتے ہوئے جے ایف 17 تھنڈر میں گہری دلچسپی کا اظہار کیا، جبکہ سپر مشاق تربیتی طیاروں میں بھی دلچسپی ظاہر کی گئی۔

عراقی فضائیہ کے سربراہ نے خطے میں امن و استحکام کے لیے پاکستان کے کردار کو قابلِ تحسین قرار دیا اور کہا کہ اس دورے سے دونوں ممالک کے دفاعی تعلقات مزید مستحکم ہوں گے۔