پنجاب میں بارشوں کی پیشگوئی، پہاڑی علاقوں میں شدید برفباری متوقع

لاہور: پنجاب کے زیادہ تر اضلاع میں آج سے 23 جنوری تک بارش کا امکان ہے، جبکہ مری، گلیات اور دیگر پہاڑی علاقوں میں شدید برفباری اور بارش متوقع ہے۔

پنجاب ڈیزاسٹر مینجمنٹ اتھارٹی (پی ڈی ایم اے) نے لاہور، سرگودھا، گوجرانوالہ، ساہیوال، ملتان، فیصل آباد، ڈیرہ غازی خان اور بہاولپور ڈویژن میں بارش کی پیشگوئی کی تصدیق کی ہے۔

موسم مجموعی طور پر سرد اور خشک رہے گا، مگر مختلف شہروں میں وقفے وقفے سے بارش اور پہاڑی علاقوں میں برفباری کا امکان ہے۔

 پی ڈی ایم اے نے تمام متعلقہ اداروں کو الرٹ رہنے اور حفاظتی اقدامات یقینی بنانے کی ہدایت کی ہے تاکہ ممکنہ سیلاب، لینڈ سلائیڈنگ یا دیگر قدرتی آفات سے بروقت نمٹا جا سکے۔

ڈی جی پی ڈی ایم اے پنجاب نے عوام سے اپیل کی ہے کہ وہ موسم کی تازہ صورتحال سے باخبر رہیں، غیر ضروری سفر سے گریز کریں اور احتیاطی تدابیر اختیار کریں۔