اسلام آباد بلدیاتی انتخابات سے متعلق صدارتی آرڈیننس؛ اسلام آباد ہائیکورٹ نے وفاق اور الیکشن کمیشن سے جواب طلب کر لیا

اسلام آباد ہائیکورٹ نے وفاقی دارالحکومت میں بلدیاتی انتخابات سے متعلق صدارتی آرڈیننس اور انتخابات کے التواء کے خلاف دائر درخواست پر وفاقی حکومت اور الیکشن کمیشن کو نوٹس جاری کرتے ہوئے جواب طلب کر لیا ہے۔

جسٹس محمد اعظم خان نے مرکزی مسلم لیگ کی جانب سے دائر درخواست پر سماعت کی۔ 

درخواست گزار انعام الرحمٰن کمبوہ اپنے وکیل اشفاق احمد کھرل کے ہمراہ عدالت میں پیش ہوئے۔

دورانِ سماعت وکیلِ درخواست گزار نے مؤقف اختیار کیا کہ لوکل گورنمنٹ آرڈیننس کو صدارتی آرڈیننس کے ذریعے نافذ کیا گیا جسے چیلنج کیا گیا ہے، جبکہ بلدیاتی انتخابات کا انعقاد الیکشن کمیشن کی اولین آئینی ذمہ داری ہے۔

وکیل نے عدالت کو بتایا کہ بلدیاتی انتخابات کا شیڈول جاری ہو چکا تھا، کاغذاتِ نامزدگی جمع ہو گئے تھے اور تمام قانونی تقاضے مکمل ہونے کے باوجود انتخابات ملتوی کر دیے گئے۔

درخواست گزار کے وکیل کا کہنا تھا کہ اسلام آباد میں اب تک چوتھی مرتبہ بلدیاتی انتخابات مؤخر کیے گئے ہیں جو جمہوری عمل کی صریح خلاف ورزی ہے۔

عدالت سے استدعا کی گئی کہ صدارتی آرڈیننس کو کالعدم قرار دے کر اسلام آباد میں فوری طور پر بلدیاتی انتخابات کرانے کا حکم دیا جائے۔

اسلام آباد ہائیکورٹ نے وفاقی حکومت اور الیکشن کمیشن سے جواب طلب کرتے ہوئے سماعت 27 جنوری تک ملتوی کر دی، جبکہ درخواست کو جماعت اسلامی کی جانب سے دائر اسی نوعیت کے کیس کے ساتھ یکجا کر دیا گیا۔