شکارپور کے کچے علاقے میں پولیس کا ڈرون آپریشن، مطلوب ڈاکو مارا گیا

 ضلع شکارپور کے کچے کے علاقے میں پولیس نے جرائم پیشہ گروہوں کے خلاف کارروائی کرتے ہوئے ڈاکوؤں کے ایک مبینہ ٹھکانے کو ڈرون حملے میں نشانہ بنایا، جس کے نتیجے میں ایک مطلوب ملزم ہلاک جبکہ ایک خاتون زخمی ہوگئیں۔

پولیس حکام کے مطابق یہ آپریشن تحصیل لکھی غلام شاہ کے گاؤں سلطان کمالانی جتوئی میں خفیہ اطلاع پر کیا گیا۔

 کارروائی کے دوران ہلاک ہونے والے شخص کی شناخت الطاف کمالانی جتوئی کے طور پر ہوئی، جو مبینہ طور پر بدنام ڈاکو شہزادہ کمالانی جتوئی کا بھائی تھا۔

پولیس کا کہنا ہے کہ یہ کارروائی شہید اہلکار صغیر سنجرانی کے قتل میں ملوث ملزمان کی گرفتاری کے لیے جاری آپریشن کا حصہ تھی۔

ڈرون حملے کے دوران ایک خاتون بھی زخمی ہوئیں، جنہیں ملزم کی والدہ بتایا جا رہا ہے۔

 زخمی خاتون کو فوری طور پر قریبی اسپتال منتقل کر دیا گیا جبکہ علاقے میں سرچ آپریشن تاحال جاری ہے۔