جاپان کے دارالحکومت ٹوکیو میں منعقد ہونے والی مشہور ٹوکیو میراتھون 2026 میں پاکستانی کھلاڑیوں نے شاندار شرکت کر کے پاکستان کا نام روشن کیا۔
اس عالمی مقابلے میں 12 پاکستانی رنرز نے 42.195 کلومیٹر کا فاصلہ کامیابی سے طے کیا، جو پاکستان میں میراتھون رننگ کے بڑھتے ہوئے رجحان اور عالمی سطح پر پاکستانی ایتھلیٹس کی بڑھتی ہوئی موجودگی کا مظہر ہے۔
پاکستانی رنرز میں ذیشان علی سب سے تیز ثابت ہوئے، جنہوں نے میراتھون 2 گھنٹے 40 منٹ 9 سیکنڈز میں مکمل کی۔
دیگر شرکاء میں صادق شاہ، ایاز عبداللّٰہ، بلال عمر، محمد ابوبکر افضل، باچا خان، اسد تنگیکر، حسن اعجاز، مقداد محمد، سمینہ خان اور شازیہ نواز شامل تھے، جن میں مرد اور خواتین دونوں شامل تھے۔
سینئر صحافی اور معروف ٹی وی اینکر رحمان اظہر نے بھی اس میراتھون میں حصہ لیا اور اپنی پانچویں ورلڈ میجر میراتھون مکمل کی، جو ان کی لگن اور برداشت کا ثبوت ہے۔
یکم مارچ کو منعقد ہونے والی اس میراتھون میں دنیا بھر سے تقریباً 40 ہزار رنرز شریک ہوئے۔
مردوں کی دوڑ ایتھوپیا کے تادیسے تاکیلے نے 2:03:37 میں جیتی، جبکہ خواتین کی دوڑ میں کینیا کی بریجڈ کوسگئی نے 2:14:29 میں نیا کورس ریکارڈ قائم کیا۔
ٹوکیو میراتھون ورلڈ ایتھلیٹکس کے پلاٹینم لیبل مقابلوں اور ایبٹ ورلڈ میراتھون میجرز سیریز کا حصہ ہے۔
پاکستانی رنرز کی شرکت پاکستان میں میراتھون رننگ کی بڑھتی ہوئی مقبولیت اور عالمی مقابلوں میں پاکستانی کھلاڑیوں کی بڑھتی ہوئی نمائندگی کو ظاہر کرتی ہے۔
Islamabad
دیکھیں
