سلطان آف جوہر کپ: جاپان سے سنسنی خیز مقابلہ برابر، پاکستان فائنل میں پہنچ گیا

پاکستان نے سلطان آف جوہر جونیئر ہاکی ٹورنامنٹ کے فائنل کے لیے کوالیفائی کرلیا۔ قومی ٹیم نے آخری لیگ میچ میں جاپان کے خلاف سنسنی خیز مقابلے کے بعد 2-2 سے ڈرا کھیلا اور دونوں ٹیموں کے پوائنٹس اور گول ڈیفرنس برابر ہونے کے باوجود زیادہ گول سکور کرنے کی بنیاد پر فائنل میں جگہ بنالی۔ 

پاکستان اور جاپان نے لیگ مرحلے میں چار چار میچز کھیل کر سات سات پوائنٹس حاصل کیے، جبکہ دونوں ٹیموں کا گول ڈیفرنس بھی پلس 8 رہا۔ 

تاہم قومی ٹیم نے چار میچز میں مجموعی طور پر 18 گول سکور کیے، جبکہ جاپان کی ٹیم 16 گول کرسکی۔ اسی فرق کی بنیاد پر پاکستان فائنل میں پہنچنے میں کامیاب ہوا۔ 

جاپان کے خلاف اہم ترین لیگ میچ میں قومی ٹیم کو ابتدا میں مشکلات کا سامنا کرنا پڑا اور جاپان نے 18ویں منٹ میں گول کرکے ایک صفر کی برتری حاصل کرلی۔ 

پاکستان کے حمزہ فیاض نے 34ویں منٹ میں شاندار گول کرکے مقابلہ ایک ایک سے برابر کردیا۔ 

جاپان نے 42ویں منٹ میں ایک مرتبہ پھر گول کرکے 2-1 کی برتری حاصل کی، لیکن پاکستان نے فوری جواب دیا۔ 

قومی ٹیم کے غلام مصطفیٰ نے اگلے ہی منٹ، یعنی 43ویں منٹ میں گول کرکے مقابلہ 2-2 سے برابر کردیا۔ 

اس کے بعد دونوں ٹیموں نے برتری حاصل کرنے کی کوشش کی، تاہم مقررہ وقت تک مزید کوئی گول نہ ہوسکا اور میچ دو دو گول سے برابر رہا۔ 

پاکستان کو چوتھے کوارٹر میں پنالٹی سٹروک پر گول کرنے کا موقع بھی ملا، لیکن قومی ٹیم اسے گول میں تبدیل نہ کرسکی۔ 

پاکستان نے لیگ مرحلے کے چار میچز میں سے دو میں کامیابی حاصل کی، ایک میچ برابر کھیلا جبکہ ایک میں شکست کا سامنا کرنا پڑا۔ 

قومی ٹیم نے چین کو 8-3 اور کینیڈا کو 6-2 سے شکست دی، جبکہ میزبان ملائیشیا کے خلاف پاکستان کو 3-2 سے شکست ہوئی تھی۔ 

جاپان کے ساتھ پوائنٹس اور گول ڈیفرنس برابر ہونے کے باوجود زیادہ گول سکور کرنے کی وجہ سے پاکستان نے فائنل کا ٹکٹ حاصل کرلیا۔ 

سلطان آف جوہر کپ کے فائنل میں پاکستان کا مقابلہ میزبان ملائیشیا سے ہوگا، جہاں قومی جونیئر ہاکی ٹیم ٹائٹل اپنے نام کرنے کے لیے میدان میں اترے گی۔