امریکا ایران کے خلاف کارروائی میں سنجیدہ، پہلے ایران کو ختم کرنا چاہتے ہیں: ٹرمپ

امریکی صدر ڈونلڈ ٹرمپ نے کہا ہے کہ امریکا جاری کشیدگی میں ایران کے مقابلے میں زیادہ سنجیدہ ہے اور ایران کو سب سے پہلے ختم کرنا چاہتا ہے۔ انہوں نے ایرانی سفارتکاروں کو پناہ لینے کی بھی اپیل کی۔

واشنگٹن میں ایک تقریب سے خطاب کرتے ہوئے ٹرمپ کا کہنا تھا کہ ایران کی بحری طاقت کو مکمل طور پر تباہ کر دیا گیا ہے اور اس کے میزائل اور ڈرون پروگرام کو ختم کرنے کی کارروائی جاری ہے۔

 ان کے مطابق فوجی آپریشن طے شدہ منصوبے کے مطابق آگے بڑھ رہا ہے اور امریکا کے پاس ایران کے خلاف کارروائی کے سوا کوئی دوسرا راستہ نہیں تھا۔

صدر ٹرمپ نے مزید کہا کہ امریکا جلد ایسے اقدامات کرے گا جن سے عالمی منڈی میں تیل کی قیمتوں پر دباؤ کم کیا جا سکے گا۔

اس سے قبل بھی ٹرمپ کا کہنا تھا کہ ایران کی آئندہ قیادت کے تعین میں امریکا کردار ادا کر سکتا ہے، جیسا کہ وینزویلا کے معاملے میں کیا گیا۔

 انہوں نے خبردار کیا کہ اگر ایران نیا جانشین مقرر کرنے کی کوشش کرے گا تو یہ وقت ضائع کرنے کے مترادف ہوگا۔

ٹرمپ نے یہ بھی کہا کہ ایران کے سپریم لیڈر کے بیٹے مجتبیٰ خامنہ ای امریکا کے لیے قابل قبول نہیں ہوں گے اور امریکا کسی ایسے رہنما کو قبول نہیں کرے گا جو موجودہ پالیسیوں کو جاری رکھے۔