جنگ بندی کی کوئی خلاف ورزی نہیں، افغان دعوے بے بنیاد قرار

پاکستان نے افغان طالبان کے ترجمان کی جانب سے آپریشن غضب للحق کی عارضی معطلی کی خلاف ورزی کے دعوے کو مسترد کرتے ہوئے اسے بے بنیاد اور گمراہ کن قرار دیا ہے۔

وزارتِ اطلاعات کے مطابق پاکستان کی جانب سے جنگ بندی کی کوئی خلاف ورزی نہیں کی گئی اور افغان فریق کے الزامات حقائق پر مبنی نہیں ہیں۔

وزارت کا کہنا ہے کہ اس قسم کا پروپیگنڈا دہشت گرد کارروائیوں کا جواز پیدا کرنے کے لیے کیا جا رہا ہے اور یہ ممکن ہے کہ یہ مہم افغان انتظامیہ کے اندرونی مخالفین کی جانب سے بھی چلائی جا رہی ہو۔

مزید کہا گیا کہ پاکستان پہلے ہی واضح کر چکا ہے کہ کسی بھی جارحانہ اقدام کی صورت میں عارضی وقفہ ختم ہو جائے گا اور سرحد پار حملوں یا دہشت گردی کا بھرپور جواب دیا جائے گا۔

واضح رہے کہ یہ آپریشن عیدالفطر کے احترام اور برادر اسلامی ممالک کی درخواست پر عارضی طور پر روکا گیا تھا۔

 وزیر اطلاعات کے مطابق سعودی عرب، ترکیے اور قطر کی درخواست پر کارروائیاں 24 مارچ کی درمیانی رات تک معطل رہیں گی۔