برطانیہ میں دل کے مریضوں کیلئے وزن کم کرنے والی دوا دینے کا منصوبہ، فالج اور دل کے دورے سے بچاؤ ممکن

برطانیہ کے سرکاری طبی ادارے نیشنل ہیلتھ سروس نے اعلان کیا ہے کہ دل کے مریضوں کو دل کے دورے اور فالج سے بچانے کے لیے وزن کم کرنے والی دوا فراہم کی جائے گی۔

ادارے کے مطابق تقریباً 12 لاکھ ایسے افراد کو ہفتہ وار انجیکشن ویگووی دیا جائے گا جو دل کے امراض یا فالج کے خطرے سے دوچار ہیں۔ 

اس دوا کی منظوری نیشنل انسٹی ٹیوٹ برائے صحت و نگہداشت معیار نے دی ہے۔

ماہرین کے مطابق یہ انجیکشن خاص طور پر ان افراد کیلئے ہے جو موٹاپے یا زائد وزن کا شکار ہیں اور ان کا جسمانی کمیت کا اشاریہ 27 یا اس سے زیادہ ہے، جبکہ وہ پہلے سے دل کی بیماری میں مبتلا ہوں۔

طبی تحقیق سے معلوم ہوا ہے کہ اس دوا میں شامل جز سیماگلوٹائیڈ دل کے دورے اور فالج کے خطرے کو تقریباً 20 فیصد تک کم کر سکتا ہے۔ 

ماہرین کا کہنا ہے کہ اس کے اثرات وزن میں نمایاں کمی سے پہلے ہی ظاہر ہونا شروع ہو جاتے ہیں، جو دل اور خون کی نالیوں کی صحت میں بہتری کی نشاندہی کرتے ہیں۔

یہ دوا جسم میں ایک ایسے ہارمون کی نقل کرتی ہے جو بھوک کو قابو میں رکھتا ہے، جس سے مریض کم خوراک لیتے ہیں اور وقت کے ساتھ وزن میں کمی آتی ہے۔ 

تاہم اس کے کچھ ضمنی اثرات بھی ہو سکتے ہیں جن میں متلی اور پیٹ کا پھولنا شامل ہیں۔

حکام کے مطابق اس منصوبے کا آغاز گرمیوں میں کیا جائے گا اور عام طور پر مریضوں کو یہ علاج دو سال تک فراہم کیا جائے گا، جبکہ اس کے طویل مدتی اثرات پر مزید تحقیق جاری رہے گی۔