قرض نہ ملنے پرانٹرنیٹ سے سیکھ کر 1 ہی خاندان کے 4 افراد قتل

تلنگانہ کی پولیس نے ایک ہی خاندان کے چار افراد کے قتل کے مقدمے میں اہم پیش رفت کرتے ہوئے واقعے کا معمہ حل کرنے کا دعویٰ کیا ہے۔ ابتدائی تفتیش کے مطابق واقعے کے پسِ منظر میں قرض، جائیداد کا تنازع اور ذاتی اختلافات شامل تھے۔

بھارتی ذرائع ابلاغ کے مطابق مرکزی ملزم نے مبینہ طور پر واردات سے پہلے انٹرنیٹ کے ذریعے قتل کرنے اور قانون نافذ کرنے والے اداروں سے بچنے کے طریقوں سے متعلق معلومات حاصل کیں۔

پولیس کے مطابق مرکزی ملزم مالی مشکلات کا شکار تھا اور متاثرہ خاندان کا پہلے سے مقروض بھی تھا۔ الزام ہے کہ اس نے مقتولہ، جو اس کی اہلیہ کی خالہ تھیں، سے مزید قرض اور جائیداد اپنے نام منتقل کرنے کا مطالبہ کیا، تاہم انکار کے بعد مبینہ طور پر قتل کی منصوبہ بندی کی گئی۔

تفتیشی حکام کے مطابق 19 جون کی صبح ملزم اپنے مبینہ ساتھیوں کے ساتھ گھر میں داخل ہوا اور خالہ، ان کے شوہر، بیٹے اور بیٹی کو حملہ کر کے قتل کر دیا۔

پولیس کا کہنا ہے کہ واردات کے بعد ملزمان نقد رقم، سونا اور جائیداد سے متعلق دستاویزات لے کر فرار ہو گئے۔ مزید دعویٰ کیا گیا کہ مبینہ طور پر حاصل کیا گیا سونا تقریباً 5 لاکھ 30 ہزار روپے میں گروی رکھا گیا۔

بھارتی ذرائع ابلاغ کے مطابق پولیس نے کارروائی کے دوران 3 لاکھ روپے نقد، سونا، مبینہ آلۂ قتل، خون آلود کپڑے، موبائل فون اور واردات میں استعمال ہونے والی گاڑی برآمد کرنے کا دعویٰ کیا ہے۔

حکام کے مطابق اس مقدمے میں چار ملزمان کو گرفتار کیا جا چکا ہے جبکہ دو دیگر مشتبہ افراد کی تلاش جاری ہے۔

واضح رہے کہ یہ تفصیلات تفتیشی اداروں کے مؤقف اور ابتدائی معلومات پر مبنی ہیں، جبکہ مقدمے کا حتمی فیصلہ عدالت کی کارروائی کے بعد سامنے آئے گا۔