فاطمہ ثناء کو ویمنز ہنڈریڈ کھیلنے کی اجازت، سری لنکا کے خلاف ٹی ٹوئنٹی سیریز سے باہر

پاکستان کرکٹ بورڈ (پی سی بی) نے قومی ویمنز ٹیم کی کپتان فاطمہ ثناء کو انگلینڈ میں ہونے والے ویمنز ہنڈریڈ ٹورنامنٹ میں شرکت کی اجازت دے دی ہے۔ اس فیصلے کے تحت وہ سری لنکا کے خلاف ٹی ٹوئنٹی سیریز میں پاکستان کی نمائندگی نہیں کریں گی۔

فاطمہ ثناء پہلے سری لنکا کے خلاف ویمنز ون ڈے سیریز کھیلیں گی، جو آئی سی سی ویمنز چیمپئن شپ کا حصہ ہے۔ 28 جولائی کو سیریز مکمل ہونے کے بعد وہ ہمبنٹوٹا سے براہِ راست انگلینڈ روانہ ہوں گی، جہاں وہ برمنگھم فینکس کی جانب سے ویمنز ہنڈریڈ ٹورنامنٹ کے باقی میچز میں شرکت کریں گی۔

24 سالہ فاطمہ ثناء گزشتہ ماہ ویمنز ہنڈریڈ کی کسی بھی ٹیم میں منتخب ہونے والی پہلی پاکستانی خاتون کرکٹر بنی تھیں۔ انہوں نے حالیہ ویمنز ٹی ٹوئنٹی ورلڈ کپ میں بھی شاندار آل راؤنڈ کارکردگی کا مظاہرہ کرتے ہوئے 11 وکٹیں حاصل کی تھیں۔ پی سی بی کے مطابق یہ فیصلہ انہیں دنیا کی مسابقتی ٹی ٹوئنٹی لیگ میں کھیلنے کا تجربہ فراہم کرنے کے لیے کیا گیا ہے، جو ان کی اور قومی ٹیم دونوں کی ترقی میں مددگار ثابت ہوگا۔