ٹرمپ نے کینیڈا سے درآمد ہونیوالی متعدد اشیا پر 50 فیصد ٹیرف عائد کر دیا

امریکی صدر ڈونلڈ ٹرمپ نے کینیڈا سے درآمد ہونے والی متعدد اشیا پر 50 فیصد محصولات (ٹیرف) عائد کر دیے ہیں۔ ان کا کہنا ہے کہ یہ اقدام امریکی گاڑیوں، ڈیری مصنوعات اور شراب کے ساتھ کیے جانے والے "غیر مساوی سلوک" کے جواب میں کیا گیا ہے۔

نئے ٹیرف کا اطلاق شراب، ہاکی اسٹکس، سیمنٹ اور دیگر صنعتی مصنوعات سمیت مختلف اشیا پر ہوگا، تاہم توانائی، پوٹاش، اہم معدنیات اور مچھلی جیسی چند بڑی کینیڈین برآمدات کو اس فیصلے سے مستثنیٰ رکھا گیا ہے۔

کینیڈا کے وزیراعظم مارک کارنی نے اس اقدام پر ردعمل دیتے ہوئے کہا ہے کہ ان کا ملک آئندہ ہفتوں میں امریکا کے ساتھ تجارتی مذاکرات میں مزید شدت لانے کے لیے تیار ہے۔

وائٹ ہاؤس کے مطابق یہ نئے ٹیرف 30 روز بعد نافذ العمل ہوں گے۔ تجزیہ کار اس فیصلے کو امریکا اور کینیڈا کے درمیان جاری تجارتی کشیدگی میں ایک اہم اضافہ قرار دے رہے ہیں۔

واضح رہے کہ امریکا اس سے قبل بھی کینیڈین اسٹیل، ایلومینیم اور تانبے پر 15 سے 50 فیصد تک ٹیرف عائد کر چکا ہے، جبکہ کینیڈین لکڑی پر 35 فیصد اور گاڑیوں میں استعمال ہونے والے غیر امریکی پرزوں پر 25 فیصد محصولات بھی پہلے سے نافذ ہیں۔

دوسری جانب کینیڈا نے بھی جوابی اقدام کے طور پر امریکی اسٹیل، ایلومینیم اور بعض گاڑیوں کی درآمدات پر 25 فیصد ٹیرف عائد کر رکھا ہے۔