رونالڈو اور جارجیناکی شادی،پانچوں بچوں کی شرکت

عالمی شہرت یافتہ فٹبالر کرسٹیانو رونالڈو اور ان کی دیرینہ ساتھی جارجینا روڈریگز نے 10 سالہ تعلق کے بعد پرتگال میں ایک نجی تقریب کے دوران شادی کرلی۔ تقریب کا انعقاد ساحلی شہر کاسکائس میں ہوا، جس میں جوڑے کے پانچ بچے بھی شریک ہوئے۔

شادی کے اعلان کے لیے جوڑے نے صرف ایک تصویر شیئر کی، جس میں دونوں کے ہاتھ ایک دوسرے پر رکھے ہوئے تھے اور سونے کی شادی کی انگوٹھیاں نمایاں تھیں۔ تصویر کے ساتھ “C G” لکھا گیا۔

جارجینا کے عروسی انداز نے فیشن اور بیوٹی حلقوں کی توجہ حاصل کی۔ انہوں نے سفید رنگ کا لمبی آستینوں والا لباس زیب تن کیا، جو ان کے عمومی طور پر نمایاں اور پرتعیش فیشن اسٹائل کے مقابلے میں خاصا سادہ دکھائی دیا۔

تاہم لباس کے ڈیزائنر اور مکمل عروسی لباس کی تفصیلات تاحال منظرعام پر نہیں آئیں۔

جارجینا کے مینیکیور نے بھی خاصی توجہ حاصل کی۔ ان کے ناخن ہلکے، نیم شفاف ملکی وائٹ رنگ میں تھے، جو روایتی فرنچ مینیکیور اور نیوڈ شیڈ کے درمیان ایک سادہ اور نفیس انداز پیش کرتے ہیں۔

جارجینا کے ہاتھ میں سادہ سونے کی شادی کی انگوٹھی نمایاں تھی، جبکہ اس کے ساتھ ان کی منگنی کی انتہائی نمایاں انگوٹھی بھی موجود تھی۔

ان کی منگنی کی انگوٹھی کے سائز اور قیمت کے بارے میں گزشتہ برس مختلف اندازے سامنے آتے رہے ہیں، تاہم اس کی حتمی قیمت یا سائز کی باضابطہ تصدیق نہیں کی گئی۔

رپورٹس کے مطابق تقریب میں رونالڈو اور جارجینا کے پانچوں بچے شریک تھے۔ ان میں کرسٹیانو جونیئر، جڑواں بچے ایوا ماریا اور میٹیو، الانا مارٹینا اور بیلا ایسمرالڈا شامل ہیں۔

تقریب کی نوعیت انتہائی نجی رکھی گئی اور مہمانوں یا تقریب کی دیگر تفصیلات عوامی سطح پر جاری نہیں کی گئیں۔