محسن نقوی کی اے سی سی کے نو منتخب نائب صدر اور ایگزیکٹو بورڈ ارکان کو مبارکباد

ایشین کرکٹ کونسل کے صدر محسن نقوی نے نو منتخب نائب صدر اور ایگزیکٹو بورڈ کے ارکان کو مبارکباد پیش کی ہے۔

محسن نقوی کا کہنا ہے کہ ایشیا میں کرکٹ ہمیشہ ایک کھیل سے بڑھ کر رہی ہے، یہ مختلف ممالک، ثقافتوں اور نسلوں کو آپس میں جوڑتی ہے۔

انہوں نے کہا کہ اجلاس میں کیے گئے فیصلے ادارے کی بہتر حکمرانی اور کھیل کے مستقبل کے لیے مشترکہ عزم کی عکاسی کرتے ہیں۔

واضح رہے کہ ایشین کرکٹ کونسل کے انتخابات میں پاکستان کے حمایت یافتہ پینل نے بھارتی حمایت یافتہ پینل کو شکست دی۔

اجلاس میں اگلے سال بنگلادیش میں ہونے والے ایشیا کپ کی تیاریوں کا بھی جائزہ لیا گیا، جس کے لیے سلہٹ، میرپور اور چٹوگرام کو ممکنہ میزبان شہروں کے طور پر تجویز کیا گیا۔