پنکی کے 3 مقدمات کے عبوری چالان ناقص تفتیش پر واپس

ڈرگ ڈیلر انمول عرف پنکی کے مقدمات کی ناقص تفتیش پر ڈپٹی ڈسٹرکٹ پراسیکیوٹر نے 3 مقدمات کے عبوری چالان واپس کر دیے۔

تینوں مقدمات کے عبوری چالان درخشاں پولیس نے جمع کرائے تھے اور تینوں مقدمات 2021 میں درج کیے گئے تھے۔ انمول عرف پنکی تینوں مقدمات میں اشتہاری تھی، جبکہ تینوں مقدمات میں ایک، ایک شریک ملزم تھا جو بری ہو چکے ہیں۔

سرکاری وکیل نے اعتراض کیا کہ عبوری چالانوں میں پنکی کے اشتہاری ہونے اور ملزمان کی بریت کا ذکر نہیں کیا گیا۔ بری ہونے والے ملزمان میں فہد حسین، سمیر اور قمر شامل ہیں۔

سرکاری وکیل کے مطابق انمول عرف پنکی کو شریک ملزمان کی نشاندہی پر ملزم بنایا گیا تھا۔ پراسیکیوٹر نے کہا کہ چالان کے ساتھ انمول عرف پنکی کو اشتہاری قرار دینے کی کارروائی کی نقول شامل کی جائیں۔

شریک ملزمان کی بریت کے فیصلوں کی نقول بھی شامل کی جائیں۔