واٹس ایپ کا نیا پاس ورڈ فیچر، ٹو اسٹیپ ویریفکیشن کو مزید محفوظ بنانے کا طریقہ

واٹس ایپ کی جانب سے صارفین کے اکاؤنٹس کو مزید محفوظ بنانے کے لیے ٹو اسٹیپ ویریفکیشن سسٹم میں تبدیلی کی جا رہی ہے، جس کے تحت موجودہ 6 ہندسوں پر مشتمل پن کی جگہ پاس ورڈ استعمال کیا جائے گا۔

اس وقت واٹس ایپ پر ٹو اسٹیپ ویریفکیشن کے لیے 6 ہندسوں پر مشتمل پن استعمال کیا جاتا ہے، تاہم نئے نظام میں اسے پاس ورڈ سے تبدیل کیا جا رہا ہے۔ واٹس ایپ کے مطابق اس تبدیلی کا مقصد اکاؤنٹس کو ہیکنگ اور غیر مجاز رسائی سے زیادہ مضبوط تحفظ فراہم کرنا ہے۔

نئے سسٹم میں پاس ورڈ حروف اور نمبروں پر مشتمل ہوگا، جس سے سیکیورٹی کو مزید بہتر بنایا جا سکے گا۔ اگر صارف پہلے ہی ٹو اسٹیپ ویریفکیشن استعمال کر رہے ہیں تو وہ دستیابی کے بعد اپنے پن کو پاس ورڈ میں اپ ڈیٹ کر سکیں گے۔

واٹس ایپ کی جانب سے یہ فیچر مرحلہ وار متعارف کرایا جا رہا ہے، اس لیے ممکن ہے کہ کچھ صارفین کو یہ آپشن فوری طور پر دستیاب نہ ہو، تاہم آنے والے ہفتوں میں مزید صارفین اس سہولت کو استعمال کر سکیں گے۔

واٹس ایپ پن کو پاس ورڈ سے کیسے تبدیل کریں؟

واٹس ایپ کا نیا پاس ورڈ فیچر ٹو اسٹیپ ویریفکیشن سسٹم کا ہی حصہ ہوگا۔ اس سے قبل صارفین کو 6 ہندسوں پر مشتمل پن بنانا ہوتا تھا، جسے اب زیادہ مضبوط تحفظ کے لیے پاس ورڈ سے اپ گریڈ کیا جا سکے گا۔

فیچر دستیاب ہونے کے بعد صارفین واٹس ایپ کھول کر سیٹنگز میں جائیں گے، پھر اکاؤنٹ کے آپشن میں جا کر ٹو اسٹیپ ویریفکیشن پر کلک کریں گے۔

یہاں نیا پاس ورڈ بنانے کا آپشن موجود ہوگا، جہاں صارف اپنا پاس ورڈ ترتیب دے سکیں گے۔ اس کے ساتھ ریکوری ای میل شامل کرنے کی سہولت بھی فراہم کی جائے گی۔

نئے پاس ورڈ میں کم از کم 8 حروف شامل ہونا ضروری ہوں گے، جبکہ اس میں کم از کم ایک حرف یا ایک نمبر شامل کرنا لازمی ہوگا۔ صارف چاہیں تو اسپیشل کریکٹرز بھی شامل کر سکتے ہیں، تاہم یہ ضروری نہیں ہوگا۔