سرگودھا: سرکاری سکول میں دو بچوں سے جنسی زیادتی کی تصدیق

 سرگودھا کے ایک سرکاری سکول میں طلبہ سے مبینہ جنسی زیادتی کے مقدمے میں اہم پیش رفت سامنے آئی ہے۔ پولیس کے مطابق دو بچوں کی ابتدائی میڈیکل رپورٹس میں جنسی زیادتی کی تصدیق ہوئی ہے، تاہم حتمی میڈیکل اور ڈی این اے رپورٹس ابھی موصول نہیں ہوئیں۔ دوسری جانب گرفتار انگلش ٹیچر صفدر عباس اور دو کم عمر ملزمان سے برآمد ہونے والے لیپ ٹاپ اور موبائل فون فرانزک جانچ کے لیے بھجوا دیے گئے ہیں۔ 

پولیس حکام کے مطابق سرکاری سکول میں طلبہ کے ساتھ مبینہ جنسی زیادتی کے معاملے کی تحقیقات جاری ہیں، جس کے دوران دو متاثرہ بچوں کے ابتدائی طبی معائنے کی رپورٹس سامنے آئی ہیں۔ 

پولیس کا کہنا ہے کہ ابتدائی میڈیکل رپورٹس میں دونوں بچوں کے ساتھ جنسی زیادتی کی تصدیق ہوئی ہے، تاہم حتمی طبی نتائج اور ڈی این اے ٹیسٹ کی رپورٹس کا انتظار کیا جارہا ہے۔ 

تحقیقاتی حکام کے مطابق گرفتار انگلش ٹیچر صفدر عباس اور دو دیگر کم عمر ملزمان سے برآمد ہونے والے لیپ ٹاپ اور موبائل فون بھی فرانزک تجزیے کے لیے متعلقہ حکام کو بھجوا دیے گئے ہیں۔ 

ان الیکٹرانک آلات کی جانچ کا مقصد مقدمے سے متعلق ڈیجیٹل شواہد کا جائزہ لینا اور تحقیقات میں معاون معلومات حاصل کرنا ہے۔ 

پولیس کے مطابق انگلش ٹیچر صفدر عباس کے خلاف درج ایف آئی آر میں الزام عائد کیا گیا ہے کہ وہ ایک 13 سالہ طالب علم کو متعدد مرتبہ مبینہ جنسی زیادتی کا نشانہ بناتا رہا۔ 

ایف آئی آر کے مطابق طالب علم کے ساتھ آخری مبینہ واقعہ 15 اکتوبر کو پیش آیا تھا۔ 

پولیس کا کہنا ہے کہ ابتدائی میڈیکل رپورٹس سامنے آنے کے بعد بھی مقدمے کی تفتیش جاری ہے اور مزید کارروائی کے لیے حتمی میڈیکل رپورٹ، ڈی این اے نتائج اور الیکٹرانک آلات کی فرانزک رپورٹس کا جائزہ لیا جائے گا۔ 

واضح رہے کہ ابتدائی طبی نتائج میں جنسی زیادتی کی تصدیق سے متعلق پولیس کا مؤقف سامنے آیا ہے، تاہم کسی مخصوص ملزم کی ذمہ داری کا حتمی تعین مزید شواہد اور عدالتی کارروائی کے ذریعے ہوگا۔