پردہ دار خواتین کو زیادہ ہراساں کیا جاتا ہے، حنا بیات
پاکستان کی معروف اداکارہ حنا بیات خواجہ نے خواتین کو ہراساں کیے جانے کے واقعات سے متعلق اپنا مشاہدہ بیان کرتے ہوئے کہا ہے کہ بعض اوقات مکمل پردے میں موجود خواتین کو عام لباس پہننے والی خواتین کے مقابلے میں زیادہ ہراسانی کا سامنا کرنا پڑتا ہے۔
سینئر اداکارہ حنا بیات اپنی اداکاری کے ساتھ ساتھ سماجی مسائل پر کھل کر اظہار خیال کرنے کے حوالے سے بھی جانی جاتی ہیں۔ وہ اپنے کیریئر کے آغاز میں میزبانی بھی کرچکی ہیں اور مختلف سماجی موضوعات پر مبنی پروگراموں کا حصہ رہی ہیں۔
نجی ٹی وی کے ایک پروگرام میں گفتگو کرتے ہوئے حنا بیات نے خواتین کے ساتھ عوامی مقامات پر پیش آنے والے رویوں سے متعلق ایک سماجی تجربے کا ذکر کیا۔
اداکارہ کے مطابق اس تجربے میں دو لڑکیوں کو پہلے عام دیسی لباس میں ایک بازار سے گزارا گیا۔ اس دوران بعض لوگوں نے انہیں دیکھا، تاہم کسی نے ان کے ساتھ کوئی نامناسب حرکت نہیں کی۔
حنا بیات نے بتایا کہ بعد میں انہی لڑکیوں کو دوپٹے کے ساتھ اسی بازار میں بھیجا گیا تو انہیں بعض افراد کی جانب سے نامناسب رویے کا سامنا کرنا پڑا۔
ان کے مطابق جب وہی لڑکیاں مکمل حجاب پہن کر بازار میں گئیں تو انہیں چھیڑ چھاڑ اور ہراسانی کا سامنا کرنا پڑا۔
اداکارہ نے کہا کہ اس تجربے کے نتائج ان کے لیے بھی حیران کن تھے، کیونکہ ایک ہی مقام پر لباس میں تبدیلی کے ساتھ لوگوں کے رویوں میں بھی فرق سامنے آیا۔
حنا بیات کے بقول اس مشاہدے سے انہیں یہ تاثر ملا کہ بعض مرد مکمل پردے میں موجود خاتون کو ایسا سمجھتے ہیں کہ وہ اپنے دفاع میں آواز نہیں اٹھائے گی یا نامناسب رویے کا مقابلہ نہیں کرپائے گی۔
انہوں نے کہا کہ اس کے برعکس سادہ اور باوقار لباس میں پراعتماد نظر آنے والی خواتین کو بعض افراد زیادہ مضبوط سمجھتے ہیں۔
اداکارہ کے بیان نے عوامی مقامات پر خواتین کے تحفظ اور ہراسانی کے مسئلے کی جانب توجہ دلائی، جبکہ ان کے بیان کردہ تجربے سے یہ سوال بھی سامنے آیا کہ کیا خواتین کے ساتھ روا رکھا جانے والا رویہ ان کے لباس کے بجائے ہراساں کرنے والوں کی سوچ سے جڑا ہے۔
واضح رہے کہ حنا بیات نے ایک مخصوص سماجی تجربے کا حوالہ دیا ہے، جس کی بنیاد پر یہ عمومی نتیجہ اخذ نہیں کیا جاسکتا کہ حجاب پہننے والی تمام خواتین کو لازماً زیادہ ہراسانی کا سامنا کرنا پڑتا ہے۔
