خیبرپختونخوا میں اپوزیشن وزارتِ اعلیٰ کے امیدوار پر تقسیم، علی امین گنڈاپور آج الوداعی خطاب کریں گے

خیبرپختونخوا میں وزارتِ اعلیٰ کے لیے اپوزیشن جماعتوں کے درمیان اختلافات شدت اختیار کر گئے ہیں، مسلم لیگ (ن) اور جمعیت علمائے اسلام اپنے اپنے امیدوار لانے کے لیے سرگرم ہیں جبکہ سیاسی رہنماؤں کی جانب سے تمام جماعتوں کو ایک مؤقف پر لانے کی کوششیں تیز کر دی گئی ہیں۔

ذرائع کے مطابق اپوزیشن لیڈر آج جمعیت علمائے اسلام (ف) کے اہم رہنماؤں سے رابطہ کریں گے۔ گزشتہ روز بھی انہوں نے گورنر خیبرپختونخوا اور مولانا عطا الرحمان سے مشاورت کی تھی تاکہ وزارتِ اعلیٰ کے امیدوار پر اتفاق رائے قائم کیا جا سکے۔

ذرائع کا کہنا ہے کہ اپوزیشن لیڈر کی خواہش ہے کہ تمام جماعتیں مل کر ایک متفقہ امیدوار کو نامزد کریں تاکہ صوبے میں مضبوط اپوزیشن کا پیغام دیا جا سکے۔

دوسری جانب مستعفی وزیراعلیٰ خیبرپختونخوا علی امین گنڈاپور نے آج شام وزیراعلیٰ ہاؤس میں اہم اجلاس طلب کر لیا ہے جس میں پی ٹی آئی کے اراکین اسمبلی اور پارٹی رہنماؤں کو مدعو کیا گیا ہے۔ علی امین گنڈاپور اجلاس سے الوداعی خطاب کریں گے۔

بتایا گیا ہے کہ وہ گزشتہ روز ڈی آئی خان روانہ ہونا چاہتے تھے مگر قریبی ساتھیوں کے مشورے پر رک گئے اور آج خطاب کے بعد رخصت ہوں گے۔

واضح رہے کہ وکیل سلمان اکرم راجہ نے تصدیق کی تھی کہ چیئرمین عمران خان نے علی امین گنڈاپور سے استعفیٰ طلب کر لیا ہے اور سہیل آفریدی کو نیا وزیراعلیٰ خیبرپختونخوا نامزد کر دیا گیا ہے۔