سوات میں انسداد پولیو ٹیم پر فائرنگ، لیویز اہلکار شہید‘ وزیراعظم شہباز شریف کا اظہارِ افسوس

خیبرپختونخوا کے ضلع سوات کے علاقے مٹہ میں انسدادِ پولیو ٹیم پر نامعلوم افراد کی فائرنگ سے ڈیوٹی پر موجود لیویز اہلکار عبدالکبیر شہید ہوگئے۔ واقعہ انظر تنگے، بیاکن کے دور افتادہ علاقے میں پیش آیا۔

پولیس کے مطابق حملہ اس وقت کیا گیا جب انسداد پولیو ٹیم بچوں کو ویکسین فراہم کر رہی تھی۔ فائرنگ کے نتیجے میں اہلکار موقع پر ہی شہید ہوگیا، جب کہ حملہ آور موقع سے فرار ہو گئے۔

وزیراعظم محمد شہباز شریف نے دہشت گرد حملے کی شدید مذمت کرتے ہوئے کہا کہ پولیو کے خاتمے کے مشن پر کام کرنے والے کارکنان پر حملے ناقابلِ برداشت ہیں۔ انہوں نے شہید لیویز اہلکار عبدالکبیر کے اہلِ خانہ سے گہرے دکھ اور ہمدردی کا اظہار کیا۔

وزیراعظم نے کہا کہ حکومت ملک سے پولیو کے مکمل خاتمے کے لیے پُرعزم ہے، اور دہشت گردی جیسے واقعات مہم کو روک نہیں سکتے۔

ان کا کہنا تھا کہ انسداد پولیو مہم پوری قوت اور عزم کے ساتھ جاری رہے گی جب تک پاکستان کو پولیو سے مکمل طور پر پاک نہیں کر لیا جاتا۔

وفاقی وزیرِ داخلہ محسن نقوی نے بھی واقعے کی مذمت کرتے ہوئے شہید اہلکار کو خراجِ عقیدت پیش کیا۔ انہوں نے کہا کہ بچوں کے مستقبل کو محفوظ بنانے والی ٹیم پر حملہ کرنے والے کسی رعایت کے مستحق نہیں۔