گورنر کے پی کا وزیراعلیٰ کا استعفیٰ مسترد، پی ٹی آئی کا مؤقف: "استعفیٰ واپس بھیجنے کی کوئی قانونی حیثیت نہیں"

پاکستان تحریک انصاف خیبرپختونخوا کے صدر جنید اکبر نے کہا ہے کہ گورنر خیبرپختونخوا کی جانب سے وزیراعلیٰ علی امین گنڈاپور کا استعفیٰ واپس بھیجنے کی کوئی قانونی حیثیت نہیں۔

پشاور ہائی کورٹ کے باہر میڈیا سے گفتگو کرتے ہوئے جنید اکبر نے بتایا کہ آج نئے وزیراعلیٰ خیبرپختونخوا کا انتخاب ہوگا۔ ان کا کہنا تھا کہ پارٹی کی قانونی ٹیم مکمل طور پر متحرک ہے اور آئینی راستے پر عمل کیا جا رہا ہے، آج اسمبلی میں ووٹنگ ہوگی۔

انہوں نے واضح کیا کہ وزیراعلیٰ خیبرپختونخوا علی امین گنڈاپور نے باضابطہ استعفیٰ دیا ہے، اگر اپوزیشن کو کوئی اعتراض ہے تو وہ عدالت سے رجوع کر سکتی ہے۔

دوسری جانب، گورنر خیبرپختونخوا فیصل کریم کنڈی نے وزیراعلیٰ کا استعفیٰ اعتراض لگا کر واپس کردیا ہے۔ گورنر کا کہنا ہے کہ انہیں علی امین گنڈاپور کے نام سے دو متضاد استعفے موصول ہوئے، جن پر دستخط ایک دوسرے سے مختلف ہیں۔

 فیصل کنڈی نے اپنے خط میں لکھا ہے کہ دونوں استعفوں کے دستخط غیرمشابہ اور تضاد کا باعث ہیں، اس لیے استعفیٰ قبول نہیں کیا جا سکتا۔