صدر ٹرمپ کا اسرائیلی پارلیمنٹ سے خطاب: "آج دہشت گردی کا نہیں، نئے دورِ امن کا آغاز ہوا"

امریکی صدر ڈونلڈ ٹرمپ نے غزہ-اسرائیل معاہدے پر تبصرہ کرتے ہوئے کہا ہے کہ آج صرف جنگ کا نہیں بلکہ دہشت گردی اور انتہا پسندی کا بھی خاتمہ ہوا ہے، اور یہ مشرقِ وسطیٰ کے نئے دورِ امن کا آغاز ہے۔ انہوں نے عرب اور اسلامی ممالک کو امن کے شراکت دار قرار دیا۔

اسرائیلی پارلیمنٹ (کنیسٹ) سے خطاب کرتے ہوئے صدر ٹرمپ نے کہا کہ غزہ پر ہونے والا یہ معاہدہ مشرق وسطیٰ کے ایک نئے تاریخی دور کا آغاز ہے۔

 انہوں نے تصدیق کی کہ آج 20 زندہ اسرائیلی یرغمالیوں اور 26 یرغمالیوں کی باقیات کو دو سال بعد اسرائیل کے حوالے کیا گیا، جو اسرائیل اور دنیا کے لیے ایک شاندار کامیابی ہے۔

 انہوں نے عرب اور مسلمان ممالک کا خصوصی شکریہ ادا کرتے ہوئے کہا کہ ان ممالک نے حماس پر دباؤ ڈال کر اہم کردار ادا کیا اور ثابت کر دیا کہ "امن محض ایک خواب نہیں، بلکہ ایک حقیقت ہے جسے ہم تعمیر کر سکتے ہیں۔"

صدر ٹرمپ نے مزید کہا کہ مشرقِ وسطیٰ جلد ایک شاندار اور خوشحال خطہ بننے جا رہا ہے، جہاں بندوقیں خاموش اور مستقبل روشن نظر آ رہا ہے۔

 انہوں نے دعویٰ کیا کہ ان کی امریکی انتظامیہ نے آٹھ ماہ میں آٹھ جنگیں رکوانے میں کامیابی حاصل کی، اور امریکی وزیر خارجہ مارکو روبیو "امریکی تاریخ کے بہترین وزیر خارجہ بنیں گے"۔

صدر ٹرمپ نے سات اکتوبر کے حملے کو یاد کرتے ہوئے کہا کہ اسے "کبھی نہیں بھولیں گے اور نہ دوبارہ ہونے دیں گے" اور اعلان کیا کہ امریکا ہمیشہ اسرائیل کے ساتھ کھڑا ہے۔

 انہوں نے یقین دلایا کہ میدان جنگ میں حاصل کی گئی فتوحات کو پورے مشرق وسطیٰ کے لیے امن اور خوشحالی میں بدلا جائے گا۔

ایران سے متعلق بڑا دعویٰ:
صدر ٹرمپ نے ایران کے جوہری پروگرام سے متعلق بات کرتے ہوئے کہا کہ امریکی فوج کے انتہائی جدید لڑاکا طیاروں اور ماہر فوجیوں پر مشتمل آپریشن کے ذریعے ایران کی جوہری تنصیبات پر کامیابی سے حملہ کیا گیا اور ایٹمی تنصیبات کا خاتمہ کر دیا گیا۔ 

انہوں نے کہا کہ ایران دو ماہ میں ایٹمی ہتھیار حاصل کرنے کے قریب تھا، اور اس مشترکہ کارروائی (اسرائیل کے ساتھ) میں اہم ایرانی جوہری تنصیبات پر 13 بم گرائے گئے۔ 

انہوں نے واضح کیا کہ ایران کے لیے دوستی اور تعاون کے دروازے کھلے ہیں، مگر ہم نے اسے جوہری ہتھیار بنانے سے روکا ہے۔

تقریر کے دوران اسرائیلی اپوزیشن کے ایک رکن نے صدر ٹرمپ کے خلاف احتجاج کیا، جسے سیکیورٹی اہلکاروں نے باہر نکال دیا۔