پرائم منسٹر ٹیلنٹ ہنٹ چیمپئن شپ میں سندھ کی ٹیموں کا شاندار مظاہرہ، گرلز اور بوائز دونوں ایونٹس کے ٹائٹل جیت لیے

news-banner

کھیل - 13 اکتوبر 2025

جامعہ کراچی میں منعقدہ پرائم منسٹر ٹیلنٹ ہنٹ چیمپئن شپ میں سندھ کی گرلز اور بوائز ٹیموں نے شاندار کارکردگی کا مظاہرہ کرتے ہوئے دونوں ایونٹس کے ٹائٹل اپنے نام کر لیے۔

 

تفصیلات کے مطابق، بوائز مقابلوں میں حیدرآباد کی ٹیم نے دوسری، جبکہ شہید بینظیر آباد نے تیسری پوزیشن حاصل کی۔ گرلز مقابلوں میں شہید بینظیر آباد کی ٹیم دوسری اور حیدرآباد کی ٹیم تیسرے نمبر پر رہی۔

 

اختتامی تقریب جامعہ کراچی میں منعقد ہوئی، جس کی صدارت جامعہ کے وائس چانسلر ڈاکٹر خالد محمود عراقی نے کی، جبکہ مہمانِ خصوصی پرائم منسٹر ٹیلنٹ ہنٹ یوتھ پروگرام سندھ ریجن کے کوآرڈی نیٹر فہد شفیق تھے۔

 

تقریب میں ایچ ای سی کے پراجیکٹ منیجر عدنان سعید، پی ایم وائی پی کے نمائندے مسٹر ذکی، آرگنائزنگ سیکریٹری و فوکل پرسن پروفیسر ڈاکٹر باسط انصاری، اور ایونٹ کوآرڈی نیٹر محمد اکبر سمیت دیگر معزز شخصیات نے شرکت کی۔

 

مہمانِ خصوصی فہد شفیق نے کہا کہ جامعہ کراچی نے ایونٹ کی شاندار میزبانی کی اور چیمپئن شپ کے انعقاد سے نیا اور باصلاحیت ٹیلنٹ سامنے آیا ہے۔ انہوں نے کہا کہ کراچی میں باکسنگ کے بے پناہ ٹیلنٹ کا مشاہدہ اس ایونٹ کے دوران ہوا۔

 

تقریب کے اختتام پر فہد شفیق نے فاتح ٹیموں کے کپتانوں کو ٹرافیاں اور میڈلز دیے، جبکہ نمایاں کارکردگی دکھانے والے کھلاڑیوں میں نقد انعامات بھی تقسیم کیے گئے۔ تین روزہ ایونٹ جامعہ کراچی کے انڈور اسپورٹس جمنازیم میں منعقد ہوا۔