کارروائی کے اعلان کے بعد پنجاب کی نصف سے زائد شوگر ملوں نے کرشنگ شروع کر دی

پنجاب میں کرشنگ سیزن کا آغاز نہ کرنے والی شوگر ملوں کے خلاف کارروائی کے اعلان کے بعد صوبے کی نصف سے زیادہ ملوں نے کرشنگ شروع کر دی ہے۔

جیو نیوز کے مطابق کین کمشنر پنجاب کا کہنا ہے کہ صوبے کی 27 شوگر ملز نے باقاعدہ کرشنگ کا آغاز کر دیا ہے، جبکہ باقی 14 ملوں کا آج معائنہ کیا جائے گا اور اُن کے خلاف کارروائی کا آغاز کیا جائے گا۔

کین کمشنر کے مطابق جو ملیں آج سے بھی کرشنگ شروع نہیں کریں گی، ان کے خلاف ایکشن پلان تیار ہے اور ایسی فیکٹریوں پر روزانہ 10 لاکھ روپے جرمانہ عائد کیا جائے گا۔

انہوں نے مزید بتایا کہ کرشنگ سیزن کی نگرانی کے لیے خصوصی ٹیمیں بنا دی گئی ہیں، کسانوں کو گنے کی بروقت ادائیگی یقینی بنائی جائے گی، جبکہ نئی چینی مارکیٹ میں آنے سے قیمتوں میں کمی متوقع ہے۔