آزاد کشمیر میں سیاسی گرما گرمی عروج پر، نئے قائدِ ایوان کے انتخاب کیلئے اسمبلی اجلاس کل طلب

آزاد کشمیر میں سیاسی صورتحال اپنے عروج پر پہنچ چکی ہے اور قانون ساز اسمبلی کا اجلاس کل دوپہر 3 بجے طلب کر لیا گیا ہے، جس میں نئے قائدِ ایوان کا انتخاب کیا جائے گا۔

پیپلز پارٹی وزیراعظم انوارالحق کے خلاف تحریکِ عدم اعتماد جمع کراچکی ہے اور وزارتِ عظمیٰ کے منصب کے لیے فیصل ممتاز راٹھور کو متفقہ امیدوار نامزد کیا ہے۔ عدم اعتماد کی تحریک کامیاب ہونے کے لیے 27 ارکان کی حمایت لازمی ہے۔

ذرائع کے مطابق پیپلز پارٹی کو اس وقت 37 ارکان کی حمایت حاصل ہے—جس میں پیپلز پارٹی کے 17، فارورڈ بلاک کے 11 اور مسلم لیگ (ن) کے 9 ارکان شامل ہیں۔ جموں و کشمیر پیپلز پارٹی اور مسلم کانفرنس کے ایک، ایک رکن اسمبلی میں موجود ہیں جبکہ تحریک انصاف کے ارکان کی تعداد 5 ہے۔

ادھر سابق وزیر اطلاعات پیر مظہر سعید کابینہ سے پہلے ہی مستعفی ہو چکے ہیں، جس کے بعد وزیراعظم انوارالحق کی حکومت کا پارلیمانی حجم کم ہو کر 8 ارکان تک رہ گیا ہے۔ پیپلز پارٹی کو مزید ارکان کی حمایت ملنے کا امکان بھی ظاہر کیا جا رہا ہے۔

ذرائع کا کہنا ہے کہ کل ہونے والا اجلاس آزاد کشمیر کے سیاسی منظر نامے کو واضح کرنے میں اہم کردار ادا کرے گا۔