لاہور ہائی کورٹ نے ناصر باغ میں درختوں کی کٹائی پر پی ایچ اے سمیت دیگر کو نوٹس جاری کر دیا

لاہور ہائی کورٹ نے ناصر باغ میں درختوں کی کٹائی سے متعلق درخواست پر پنجاب ہاؤسنگ اتھارٹی (پی ایچ اے) سمیت دیگر متعلقہ اداروں کو نوٹس جاری کر دیا ہے۔

 جسٹس شاہد کریم کی سربراہی میں سماعت کے دوران درخواست گزار اظہر صدیق نے موقف اختیار کیا کہ عدالتی احکامات کے باوجود ناصر باغ میں درخت کاٹے گئے ہیں، اور اس سے قبل کینٹ میں بھی بوہڑ کے درخت کو کاٹا گیا۔

عدالت نے ریمارکس دیے کہ بار بار کہنے کے باوجود درخت کیسے کٹ جاتے ہیں؟ درخواست میں مزید کہا گیا کہ اکثر درخت کٹنے کے بعد محض معافی مانگ لی جاتی ہے، اس لیے عدالت ناصر باغ میں درختوں کی کٹائی کرنے والوں کے خلاف کارروائی کا حکم دے۔

لاہور ہائی کورٹ نے درخواست پر مزید کارروائی 5 دسمبر تک ملتوی کر دی۔