کیمرون میں اپوزیشن کے سینئر رہنما اینیسیٹ اکنے فوجی حراست میں وفات پا گئے

کیمرون کے معروف اپوزیشن رہنما اینیسیٹ اکنے پیر کی صبح دارالحکومت یاونڈے کی ایک فوجی جیل میں انتقال کر گئے۔

 ان کے خاندان اور وکلاء نے تصدیق کی کہ انہیں 38 دن قبل بندرگاہی شہر دوالا سے گرفتار کیا گیا تھا۔

ان کی موت نے ملک بھر میں شدید غصے کی لہر دوڑا دی ہے، خاص طور پر اس وقت جب ملک میں اکتوبر کے متنازعہ صدارتی انتخابات کے بعد سیاسی بے چینی پہلے ہی شدید ہے۔ 

ان انتخابات میں 92 سالہ صدر پال بیا نے ایک بار پھر کامیابی کا دعویٰ کیا تھا، جسے اپوزیشن دھاندلی قرار دیتی ہے۔

گرفتاری اور الزامات

اکنے، بائیں بازو کی جماعت MANIDEM کے سربراہ، کو اس وقت گرفتار کیا گیا جب انہوں نے اپوزیشن امیدوار عیسٰی چیروما بکاری کی حمایت کی، جو سرکاری نتائج کو مسترد کرتے ہوئے دعویٰ کرتے ہیں کہ اصل فاتح وہی تھے۔

حکام نے اکنے پر بغاوت اور سرکشی کے الزامات عائد کیے، جنہیں ان کی جماعت سیاسی انتقام قرار دیتی ہے۔

حراست میں صحت بگڑتی رہی

ان کے بڑے بیٹے مونا اکنے کے مطابق، ان کے والد کو گزشتہ ہفتے سے شدید سانس لینے میں دشواری تھی۔

"ایک ہفتے تک وہ سانس نہیں لے پا رہے تھے، وہ دم گھٹنے کی کیفیت میں تھے،"

انہوں نے کہا، اور بتایا کہ اہلِ خانہ نے بارہا حکام کو خبردار کیا، مگر کوئی قدم نہیں اٹھایا گیا۔

 

وکیل ایمانوئل سمہ نے کہا کہ اکنے پہلے سے بیمار تھے لیکن انہیں مناسب علاج نہیں دیا گیا۔

حکومت کا مؤقف

حکومت کا کہنا ہے کہ انہیں فوجی ڈاکٹروں اور ذاتی معالجین دونوں نے علاج فراہم کیا۔ وزیرِ اطلاعات رینی ایمانوئیل سادی نے افسوس کا اظہار کیا، جبکہ صدر پال بیا نے واقعے کی تحقیقات کا حکم دیا ہے۔

تاہم MANIDEM نے اس واقعے کو "قتل" قرار دیا ہے۔

یورپی یونین نے بھی گہری افسوس کا اظہار کرتے ہوئے انتخابات کے بعد سے غیر قانونی طور پر حراست میں لیے گئے تمام افراد کی رہائی کا مطالبہ دہرایا۔

پانچ دہائیوں کی سیاسی جدوجہد

اکنے تقریباً پچاس برس سے سیاسی سرگرمیوں میں مصروف تھے اور 1990 کی دہائی میں ملٹی پارٹی سیاست کے لیے جدوجہد کے اہم رہنما تھے۔

ان کی موت ایسے وقت میں ہوئی ہے جب انتخابی نتائج کے خلاف ملک بھر میں احتجاج جاری ہے۔

 حکومت کا کہنا ہے کہ 16 افراد ہلاک ہوئے، جبکہ اپوزیشن اور انسانی حقوق کے گروپ یہ تعداد 55 سے زیادہ بتاتے ہیں۔

اکنے کے حمایت یافتہ امیدوار چیروما پہلے ہی گیمبیا فرار ہو چکے ہیں۔