امریکی صدر ٹرمپ بھارت سے چاول کی درآمدات پر سخت ٹیرف عائد کرنے کا عندیہ دے دیا

امریکی صدر ڈونلڈ ٹرمپ نے خبردار کیا ہے کہ وہ بھارت سے زرعی درآمدات، خاص طور پر چاول، پر سخت نئے ٹیرف عائد کر سکتے ہیں۔

 وائٹ ہاؤس میں کسانوں کے لیے اربوں ڈالر کے امدادی منصوبے کے اعلان کے دوران صدر ٹرمپ نے بھارت اور کینیڈا کے ساتھ جاری تجارتی مذاکرات پر سخت ناراضگی کا اظہار کیا۔

ٹرمپ نے کہا کہ بھارتی چاولوں کی درآمدات امریکی کسانوں کے لیے نقصان دہ ہیں اور ضرورت پڑنے پر ٹیرف کے ذریعے فوری کارروائی کی جا سکتی ہے۔

 انہوں نے مزید کہا کہ امریکی مارکیٹ میں بھارتی چاولوں کی ’ڈمپنگ‘ برداشت نہیں کی جائے گی اور حکومت کسانوں کو مضبوط بنانے کے لیے ٹیرف کو مؤثر ہتھیار کے طور پر استعمال کرے گی۔

صدر ٹرمپ نے اعلان کیا کہ کسانوں کے لیے 12 ارب ڈالر کی نئی امداد فراہم کی جائے گی، جو دیگر ممالک پر عائد کیے گئے ٹیرف سے حاصل ہونے والی آمدنی سے پوری کی جائے گی۔ 

علاوہ ازیں، کینیڈا سے درآمد ہونے والی کھاد پر بھی ممکنہ ٹیرف کا عندیہ دیا گیا۔