ای ایس پی این کرک انفو کی ٹی20 ٹیم آف دی ایئر 2025 کا اعلان، کوئی پاکستانی کھلاڑی شامل نہ ہو سکا

معروف کرکٹ ویب سائٹ ای ایس پی این کرک انفو نے سال 2025 کے لیے اپنی ٹی20 ٹیم آف دی ایئر کا اعلان کر دیا، جس کے بعد شائقینِ کرکٹ میں خاصی بحث چھڑ گئی ہے۔

 حیران کن طور پر اس عالمی الیون میں کسی بھی پاکستانی کرکٹر کو جگہ نہیں دی گئی۔

یہ انتخاب ایسے سال کی عکاسی کرتا ہے جس میں پاکستان کے کئی نمایاں کھلاڑی فرنچائز کرکٹ میں مصروف رہے اور بین الاقوامی ٹی20 مقابلوں میں کم نظر آئے۔

 ٹیم کی تشکیل بھارت اور انگلینڈ کے مضبوط کھلاڑیوں کے گرد کی گئی ہے، جہاں دونوں ممالک کے تین، تین کھلاڑی شامل ہیں۔

ویسٹ انڈیز کی نمائندگی دو جارحانہ پاور ہٹرز کر رہے ہیں، جبکہ آسٹریلیا، افغانستان اور جنوبی افریقہ سے ایک، ایک نمایاں کھلاڑی کو ٹیم میں شامل کیا گیا ہے۔

بیٹنگ لائن اپ جدید اور جارحانہ ٹی20 کرکٹ کا عکاس ہے، جہاں اننگز کا آغاز ابھیشیک شرما اور فل سالٹ کریں گے۔

 جوس بٹلر کو پاور پلے اور مڈل اوورز کے درمیان تسلسل برقرار رکھنے پر ٹیم کی ریڑھ کی ہڈی قرار دیا گیا ہے۔

 مڈل آرڈر میں نکولس پوران اور ڈیوالڈ بریوس شامل ہیں، جبکہ آسٹریلیا کے ٹم ڈیوڈ کو فنشر کا کردار سونپا گیا ہے۔

بولنگ ڈیپارٹمنٹ کی قیادت جسپریت بمراہ کر رہے ہیں، جن کے ساتھ ورون چکرورتی، نور احمد، سیم کرن اور جیسن ہولڈر شامل ہیں، جو اس ہائی امپیکٹ ٹی20 اسکواڈ کو مکمل کرتے ہیں۔