پاکستان اسٹاک ایکسچینج میں تاریخی تیزی، 100 انڈیکس پہلی بار ایک لاکھ 75 ہزار پوائنٹس سے تجاوز

پاکستان اسٹاک ایکسچینج میں رواں سال کے آخری کاروباری ہفتے کے تیسرے روز زبردست تیزی دیکھنے میں آئی، جس کے نتیجے میں 100 انڈیکس نئی تاریخ رقم کرتے ہوئے ایک لاکھ 75 ہزار پوائنٹس کی حد عبور کر گیا۔

کاروبار کے دوران 100 انڈیکس 208 پوائنٹس کے اضافے کے ساتھ ایک لاکھ 74 ہزار 681 پوائنٹس تک پہنچا، جبکہ کچھ دیر بعد انڈیکس ایک لاکھ 75 ہزار 232 پوائنٹس کی بلند ترین سطح کو بھی چھو گیا۔ گزشتہ کاروباری روز کے اختتام پر 100 انڈیکس ایک لاکھ 74 ہزار 472 پوائنٹس پر بند ہوا تھا۔

سال بھر پاکستان اسٹاک ایکسچینج سرمایہ کاروں کی توجہ کا مرکز رہی، جہاں ملکی معیشت پر بڑھتے اعتماد کے باعث شیئرز کی خریداری کا رجحان نمایاں رہا۔ مارکیٹ کیپٹلائزیشن میں 39 فیصد اضافہ ہو کر 197 کھرب روپے تک جا پہنچی، جبکہ 100 انڈیکس میں مجموعی طور پر 52 فیصد اضافہ ریکارڈ کیا گیا۔

رواں سال کے دوران 100 انڈیکس میں 59 ہزار پوائنٹس کا نمایاں اضافہ ہوا، جبکہ ماہرین کے مطابق آئندہ سال انڈیکس کے 2 لاکھ پوائنٹس کی سطح عبور کرنے کے امکانات بھی ظاہر کیے جا رہے ہیں۔