زمونگ کور سے بچوں کو نکالنے کے معاملے پر وزیراعلیٰ خیبرپختونخوا کا فوری انکوائری کا حکم

وزیراعلیٰ خیبرپختونخوا سہیل آفریدی نے زمونگ کور سے بچوں کے نکالے جانے کے معاملے پر فوری انکوائری کا حکم دے دیا ہے۔

وزیراعلیٰ نے گزشتہ رات یتیم اور بے سہارا بچوں کے لیے قائم زمونگ کور ماڈل انسٹیٹیوٹ کا اچانک دورہ کیا، جہاں انہوں نے بچوں اور انتظامیہ سے ملاقات کی، مسائل سنے اور موقع پر ہی احکامات جاری کیے۔

سہیل آفریدی نے زمونگ کور سے 11 بچوں کے اخراج کے معاملے کی فوری تحقیقات کا حکم دیتے ہوئے بچوں کو فراہم کی جانے والی ہائیجین کٹس کی تقسیم پر بھی انکوائری کی ہدایت کی۔ 

انہوں نے کلاس رومز میں کیمروں کی تنصیب اور مطلوبہ اساتذہ کی فوری فراہمی کے احکامات بھی جاری کیے۔

وزیراعلیٰ نے بچوں کے لیے کمپلینٹ سیل قائم کرنے کا فیصلہ کیا اور اعلان کیا کہ زمونگ کور کے نجی کالجز میں زیرِ تعلیم بچوں کی فیس حکومت ادا کرے گی۔

 انہوں نے ایٹا میرٹ اسکالرشپس میں زمونگ کور کے بچوں کے لیے خصوصی کوٹہ مختص کرنے، اکاؤنٹس سسٹم اور بچوں کو دیے جانے والے وظیفے کی ادائیگی کو ڈیجیٹل بنانے کی بھی ہدایت دی۔

انہوں نے کالجز اور اسپورٹس اکیڈمیز جانے والے بچوں کے لیے ٹرانسپورٹ سروس فراہم کرنے کا بھی حکم دیا۔

دورے کے دوران وزیراعلیٰ نے زمونگ کور کے مختلف سیکشنز کا معائنہ کیا، کھانے کے معیار کا جائزہ لیا اور گرلز کیمپس کا دورہ کیا، جہاں گزشتہ دورے میں دیے گئے احکامات پر عملدرآمد کا جائزہ بھی لیا گیا۔

سہیل آفریدی نے کہا کہ یتیم اور بے سہارا بچوں کی دیکھ بھال حکومت کی آئینی، اخلاقی اور انسانی ذمہ داری ہے۔ زمونگ کور انسٹیٹیوٹ عمران خان کے احساس وژن کے تحت قائم کیے گئے ہیں اور انہیں اصل روح کے مطابق چلایا جائے گا۔ انہوں نے کہا کہ وہ زمونگ کور کے تمام معاملات کی خود نگرانی کریں گے۔