امریکی حملے میں 40 افراد ہلاک، فوجی اہلکار بھی شامل: وینزویلا حکام

کراکس: وینزویلا کے ایک سینئر سرکاری عہدیدار نے دعویٰ کیا ہے کہ امریکا کے حملے میں فوجی اہلکاروں سمیت 40 افراد ہلاک ہوئے۔

نیویارک ٹائمز کے مطابق عہدیدار نے نام ظاہر نہ کرنے کی شرط پر بتایا کہ ہلاک ہونے والوں میں شہری اور فوجی دونوں شامل ہیں اور یہ حملے ہفتے کی صبح کیے گئے۔

 امریکی حکام نے ابھی ہلاکت کی تصدیق یا تردید نہیں کی۔

قبل ازیں صدر ڈونلڈ ٹرمپ نے فوکس نیوز سے گفتگو میں کہا کہ امریکی فوجیوں کی ہلاکت نہیں ہوئی، تاہم متعدد فوجی زخمی ہوئے ہیں۔

 امریکی جوائنٹ چیفس آف سٹاف کے چیئرمین جنرل ڈین کین کے مطابق امریکی ہیلی کاپٹرز نے صدر نکولس مادورو اور ان کی اہلیہ کو ہٹانے کی کارروائی کی، ایک ہیلی کاپٹر نشانے پر آیا لیکن پرواز کے قابل رہا اور تمام امریکی طیارے بحفاظت واپس آئے۔

یاد رہے کہ امریکی فوج نے گزشتہ روز وینزویلا کے دارالحکومت اور دیگر مقامات پر کارروائی کر کے صدر مادورو اور ان کی اہلیہ کو گرفتار کیا اور نیویارک منتقل کر دیا، جہاں انہیں آج امریکی عدالت میں پیش کیا جائے گا۔