وزیراعظم نے سپیکر ایاز صادق کو پی ٹی آئی سے مذاکرات کی اجازت دے دی

اسلام آباد: وزیراعظم شہباز شریف نے حکومت اور پاکستان تحریک انصاف (پی ٹی آئی) کے درمیان مذاکرات کے لیے گرین سگنل دے دیا ہے۔

ذرائع کے مطابق وزیراعظم نے اس معاملے پر سپیکر سردار ایاز صادق کو اختیار دے دیا ہے اور حکومتی وفد بھی سپیکر کی درخواست پر مذاکرات کے لیے تیار ہے۔ 

حکومتی ذرائع کا کہنا ہے کہ مذاکرات صرف پی ٹی آئی کے منتخب نمائندوں سے ہوں گے، غیر منتخب نمائندوں سے بات چیت نہیں کی جائے گی۔

سپیکر آفس کے مطابق ابھی تک پی ٹی آئی کے کسی رہنما نے باضابطہ رابطہ نہیں کیا۔ 

سردار ایاز صادق نے پارلیمانی کمیٹی برقرار رکھی ہوئی ہے اور اپوزیشن کی رضا مندی کی صورت میں فوری طور پر اجلاس بلائیں گے۔

وفاقی وزیر پارلیمانی امور طارق فضل چودھری نے کہا کہ اتحادی مذاکرات کے حق میں ہیں اور ملک کو بہتر انداز میں چلانے کے لیے مذاکرات ضروری ہیں۔

 انہوں نے اپوزیشن پر زور دیا کہ اگر پی ٹی آئی سپیکر کے چیمبر میں آئے تو مذاکرات ہو سکتے ہیں اور اپوزیشن لیڈر کے معاملے سمیت کوئی بھی مسئلہ مذاکرات کے ذریعے حل کیا جا سکتا ہے۔

طارق فضل چودھری نے مزید کہا کہ پی ٹی آئی میں اختلافات ہیں اور دو دھڑے الگ الگ موقف اختیار کیے ہوئے ہیں، جس کی وجہ سے مذاکرات میں سنجیدگی دکھانے کی ضرورت ہے۔