ملک بھر میں شدید سردی برقرار، میدانی علاقوں میں دھند جبکہ بلوچستان میں درجہ حرارت منفی میں چلا گیا

محکمہ موسمیات کے مطابق ملک کے بیشتر حصوں میں موسم سرد اور خشک رہنے کا امکان ہے، جبکہ پہاڑی علاقوں میں شدید سردی کی لہر بدستور جاری رہے گی۔

پنجاب، بالائی سندھ اور خیبرپختونخوا کے میدانی علاقوں میں صبح اور رات کے اوقات کے دوران درمیانی سے شدید دھند چھائے رہنے کی پیش گوئی کی گئی ہے، جس کے باعث حدِ نگاہ میں نمایاں کمی ہو سکتی ہے۔

اسلام آباد اور اس کے گردونواح میں موسم سرد اور خشک رہنے کا امکان ہے، تاہم صبح کے وقت چند مقامات پر کہرا پڑ سکتا ہے۔

 پنجاب کے بیشتر اضلاع میں سرد اور خشک موسم رہے گا، جبکہ مری، گلیات اور ملحقہ علاقوں میں شدید سردی متوقع ہے۔

بالائی سندھ کے اضلاع سکھر، لاڑکانہ، دادو اور اطراف کے علاقوں میں بھی درمیانی سے شدید دھند کا امکان ظاہر کیا گیا ہے۔

 خیبرپختونخوا کے میدانی علاقوں میں سرد اور خشک موسم رہے گا، جبکہ پشاور، مردان، بنوں اور ڈی آئی خان سمیت کئی علاقوں میں دھند چھا سکتی ہے۔

گلگت بلتستان اور کشمیر میں موسم شدید سرد اور خشک رہنے کی توقع ہے، تاہم کشمیر کے بعض علاقوں میں صبح کے وقت کہرا پڑنے کا امکان ہے۔

محکمہ موسمیات کے مطابق بلوچستان کے بیشتر اضلاع میں موسم سرد اور خشک رہے گا، جبکہ شمالی علاقوں میں شدید سردی کے باعث کم سے کم درجہ حرارت منفی میں ریکارڈ کیا گیا ہے۔

کوئٹہ میں کم سے کم درجہ حرارت منفی 4، قلات میں منفی 7، زیارت میں منفی 9 اور ژوب میں منفی 2 ڈگری سینٹی گریڈ ریکارڈ ہوا۔

 سبی میں درجہ حرارت 6، تربت میں 12، نوکنڈی میں 1، چمن میں منفی 1 جبکہ گوادر میں 12 اور جیوانی میں 11 ڈگری سینٹی گریڈ رہا۔

محکمہ موسمیات نے شہریوں کو سرد موسم کے دوران احتیاطی تدابیر اختیار کرنے، بالخصوص بچوں، بزرگوں اور کمزور افراد کی خصوصی دیکھ بھال کی ہدایت کی ہے۔