فیلڈ مارشل عاصم منیر سے بنگلہ دیش ایئر چیف کی ملاقات، دفاعی تعلقات اور خطے کی سلامتی پر تبادلہ خیال

فیلڈ مارشل سید عاصم منیر سے بنگلہ دیش فضائیہ کے سربراہ ایئر چیف مارشل حسن محمود خان نے ملاقات کی، جس میں دوطرفہ دفاعی تعلقات، پیشہ ورانہ عسکری تعاون اور خطے میں مجموعی سلامتی کے امور پر تفصیلی تبادلہ خیال کیا گیا۔

 ملاقات میں دونوں ممالک کے درمیان دفاعی تعاون کو مزید فروغ دینے پر اتفاق کیا گیا۔

پاک فوج کے شعبہ تعلقات عامہ (آئی ایس پی آر) کے مطابق ملاقات میں مشترکہ تربیتی پروگرامز، تربیتی تبادلوں اور پیشہ ورانہ عسکری تعلقات کو مزید مضبوط بنانے پر خصوصی زور دیا گیا۔ 

فیلڈ مارشل عاصم منیر نے بنگلہ دیش کے ساتھ دیرپا دفاعی تعلقات کو مضبوط بنانے کے عزم کا اعادہ کیا۔

اس موقع پر ایئر چیف مارشل حسن محمود خان نے پاک فوج کی پیشہ ورانہ صلاحیتوں کو سراہا اور خطے میں امن و استحکام کے لیے پاک فوج کے کردار کی تعریف کی۔

اس سے قبل بنگلہ دیش کے ایئر چیف نے نیول ہیڈکوارٹرز اسلام آباد میں پاک بحریہ کے سربراہ ایڈمرل نوید اشرف سے بھی ملاقات کی۔

 ملاقات میں علاقائی سلامتی، دوطرفہ دفاعی تعاون اور مشترکہ تربیتی مشقوں کو بڑھانے کے امکانات پر بات چیت ہوئی۔

فریقین نے اعلیٰ سطحی تبادلوں اور مشترکہ تربیتی مشقوں میں اضافہ کرنے پر اتفاق کیا، جس سے دونوں ممالک کے مسلح افواج کے درمیان اعتماد اور تعلقات مزید مستحکم ہوں گے۔