مولانا فضل الرحمان تین روزہ دورے پر لاہور پہنچیں گے، مختلف اجتماعات سے خطاب کریں گے

جے یو آئی پنجاب کے ترجمان حافظ غضنفر عزیز نے اعلان کیا ہے کہ جماعت کے سربراہ مولانا فضل الرحمان تین روزہ دورے پر کل لاہور پہنچیں گے۔

ترجمان کے مطابق 11 جنوری کو صبح 10 بجے مولانا فضل الرحمان جامعہ اشرفیہ لاہور میں تعزیتی اجتماع اور مدارس کنونشن سے خطاب کریں گے، جبکہ بعد از نماز ظہر جامعہ مدنیہ جدید، رائیونڈ روڈ لاہور میں ختم بخاری کے اجتماع سے بھی خطاب کریں گے۔

مولانا فضل الرحمان 12 جنوری کو بعد نماز ظہر صوبائی ڈیجیٹل میڈیا کنونشن میں بھی شریک ہوں گے۔ اس دورے کے دوران وہ علماء کرام، سماجی شخصیات، جماعتی ذمہ داران اور پارٹی ورکرز سے ملاقاتیں کریں گے۔

اس دورے میں مرکزی کوآرڈینیٹر انجینئر ضیاء الرحمان، صوبائی امیر مولانا صفی اللہ، سیکرٹری جنرل حافظ نصیر احمد احرار سمیت دیگر عہدیداران بھی ان کے ہمراہ ہوں گے۔