آئرلینڈ نے ٹی20 ورلڈ کپ 2026 کے لیے 15 رکنی اسکواڈ کا اعلان کر دیا، پال اسٹرلنگ کپتان

آئرلینڈ نے سری لنکا اور بھارت میں ہونے والے آئی سی سی مین ٹی ٹوئنٹی ورلڈ کپ 2026 کے لیے اپنے 15 رکنی اسکواڈ کا اعلان کر دیا ہے۔

 تجربہ کار اوپنر اور ٹی20 فارمیٹ میں آئرلینڈ کے سب سے زیادہ رنز بنانے والے بلے باز پال اسٹرلنگ ایک بار پھر ٹیم کی قیادت کریں گے، جبکہ وکٹ کیپر بلے باز لورکن ٹکر نائب کپتان ہوں گے۔

آئرلینڈ کے اسکواڈ میں شامل کھلاڑی یہ ہیں: پال اسٹرلنگ (کپتان)، مارک اڈائر، راس اڈائر، بین کیلٹز، کرٹس کیمفر، گیرتھ ڈیلینی، جارج ڈاکریل، میتھیو ہمفریز، جوش لٹل، بیری مک کارتی، ہیری ٹیکٹر، ٹِم ٹیکٹر، لورکن ٹکر، بین وائٹ اور کریگ ینگ۔

اعلان کردہ 15 میں سے 12 کھلاڑی گزشتہ ایڈیشن میں بھی آئرلینڈ کی نمائندگی کر چکے ہیں، جبکہ ٹِم ٹیکٹر، بین کیلٹز اور میتھیو ہمفریز نئے چہروں کے طور پر ٹیم میں شامل ہیں۔

 یہ آئرلینڈ کی ٹی20 ورلڈ کپ میں نویں شرکت ہوگی، جس کی بہترین کارکردگی 2009 اور 2022 میں رہی جب ٹیم نے دوسرے مرحلے تک رسائی حاصل کی اور سابق چیمپئنز ویسٹ انڈیز اور انگلینڈ کو شکست دی۔

آئرلینڈ کے قومی سلیکٹر اینڈریو وائٹ کا کہنا ہے کہ ٹیم اس بار پہلے سے بہتر کارکردگی دکھانے کے لیے پُرعزم ہے۔ 

انہوں نے کہا کہ 2022 کا ٹورنامنٹ یادگار رہا، تاہم 2024 میں ٹیم اپنی بہترین فارم میں نہیں تھی اور اب وہ اس کا ازالہ کرنا چاہتی ہے۔

ورلڈ کپ سے قبل آئرلینڈ اٹلی اور متحدہ عرب امارات کے خلاف میچز کھیلے گی۔

 ٹی20 ورلڈ کپ میں آئرلینڈ کو گروپ بی میں سری لنکا، آسٹریلیا، عمان اور زمبابوے کے ساتھ رکھا گیا ہے۔

 آئرلینڈ اپنا پہلا میچ 8 فروری کو کولمبو میں سری لنکا کے خلاف کھیلے گا۔