شدید سردی: پنجاب کے تعلیمی اداروں میں چھٹیاں بڑھانے پر غور، آج حتمی فیصلہ متوقع

سردی کی شدت میں اضافے کے پیش نظر پنجاب کے تعلیمی اداروں میں چھٹیوں میں توسیع کا امکان ظاہر کیا جا رہا ہے۔

 ذرائع کے مطابق صوبے بھر کے اسکولوں میں چھٹیاں ایک ہفتے تک بڑھائی جا سکتی ہیں۔

اس حوالے سے وزیر تعلیم پنجاب رانا سکندر حیات نے آج سہ پہر 3 بجے اہم اجلاس طلب کر لیا ہے، جس میں محکمہ موسمیات کی رپورٹس کا تفصیلی جائزہ لیا جائے گا۔

ذرائع کا کہنا ہے کہ شدید سرد موسم کے باعث والدین کی جانب سے بھی چھٹیاں بڑھانے کا مطالبہ سامنے آیا ہے۔

 وزیر تعلیم نے اس مؤقف کی تصدیق کرتے ہوئے کہا کہ بچوں کی صحت حکومت کی اولین ترجیح ہے اور چھٹیوں میں توسیع سے متعلق حتمی فیصلہ آج ہی کیا جائے گا۔