پاک نیوی کی جامع بحری مشق: زمین سے فضا میں مار کرنے والے میزائل کا کامیاب تجربہ

اسلام آباد: پاک بحریہ نے زمین سے فضا میں مار کرنے والے میزائل کا کامیاب تجربہ کیا، جبکہ شمالی بحیرۂ عرب میں ایک جامع بحری مشق کے ذریعے اپنی آپریشنل تیاری اور جنگی صلاحیتوں کا بھرپور مظاہرہ کیا۔

پاک فوج کے شعبہ تعلقات عامہ (آئی ایس پی آر) کے مطابق، مشق میں جدید فضائی دفاعی نظام اور بغیر پائلٹ سطحی بحری جہاز (USV) کی صلاحیتوں کو آزمایا گیا۔ مشق کے دوران ایل وائی–80 (این) میزائل نے فضائی ہدف کو کامیابی سے تباہ کیا، جس سے پاکستان نیوی کے طویل فاصلے تک مؤثر فضائی دفاعی نظام کی تصدیق ہوئی۔

اس کے علاوہ جدید لوئٹرنگ میونیشن کے ذریعے سطحِ آب کے اہداف کو بھی کامیابی سے نشانہ بنایا گیا، جس نے پاکستان نیوی کی پریسیژن اسٹرائیک صلاحیتوں کو اجاگر کیا۔

 بغیر پائلٹ سطحی بحری جہاز کی ٹیسٹنگ میں تیز رفتار کارکردگی، درست نیویگیشن اور سخت موسمی حالات میں مؤثر صلاحیتیں دیکھنے کو ملیں۔

مشق کا مشاہدہ کمانڈر پاکستان فلیٹ نے کیا، اور چیف آف دی نیول اسٹاف ایڈمرل نوید اشرف نے افسران اور جوانوں کی پیشہ ورانہ مہارت کو سراہا۔

 آئی ایس پی آر نے کہا کہ پاکستان نیوی ہر صورت میں قومی بحری دفاع اور سمندری مفادات کے تحفظ کو یقینی بناتی رہے گی۔