شام میں اہم پیش رفت: کرد فورسز کا انخلا، فوری جنگ بندی پر اتفاق

شام میں شامی حکومت اور کرد قیادت کے زیر اثر سرگرم سیریئن ڈیموکریٹک فورسز (ایس ڈی ایف) کے درمیان جاری جھڑپوں کے بعد فوری جنگ بندی پر اتفاق ہو گیا ہے۔

 دونوں فریقین نے تمام محاذوں پر فائر بندی کا اعلان کر دیا ہے۔

غیر ملکی میڈیا رپورٹس کے مطابق شامی فوج نے شمالی شہر رقہ کی جانب تیز پیش قدمی کرتے ہوئے پہلے طبقا شہر کا کنٹرول حاصل کیا، جس کے بعد ایس ڈی ایف کے ساتھ جنگ بندی کا معاہدہ طے پایا۔

معاہدے کے تحت ایس ڈی ایف فورسز دریائے فرات کے مشرقی علاقوں میں واپس چلی جائیں گی، جبکہ دیر الزور اور رقہ کے صوبے مکمل طور پر شامی حکومت کے کنٹرول میں دے دیے جائیں گے۔

طے پایا ہے کہ دونوں صوبوں کے تمام سول اور انتظامی ادارے دمشق حکومت کے ماتحت کام کریں گے اور سابق سرکاری ملازمین کو دوبارہ بحال کیا جائے گا۔

 شامی حکومت نے یقین دہانی کرائی ہے کہ ایس ڈی ایف سے وابستہ افراد یا جنگجوؤں کے خلاف کوئی انتقامی کارروائی نہیں کی جائے گی۔

جنگ بندی کے بعد شامی حکومت کو سرحدی گزرگاہوں کے علاوہ تیل اور گیس کے اہم ذخائر کا کنٹرول بھی حاصل ہو گیا ہے۔

 الحسکہ میں موجود سول اداروں کو ریاستی نظام میں ضم کیا جائے گا اور صدر کی جانب سے گورنر کی تقرری کے احکامات جاری کیے جائیں گے۔

معاہدے کے مطابق ایس ڈی ایف کی سفارش پر بعض سینئر فوجی، سیکیورٹی اور سول عہدوں پر تقرریاں کی جائیں گی، جبکہ کوبانی سے بھاری فوجی دستے واپس بلا لیے جائیں گے۔

 اس کے ساتھ ساتھ مقامی افراد پر مشتمل سیکیورٹی فورس اور وزارت داخلہ کے تحت مقامی پولیس قائم کی جائے گی۔

ادھر شامی فوج کی پیش قدمی کے بعد رقہ میں شہریوں کی بڑی تعداد سڑکوں پر نکل آئی اور پیش رفت کا خیر مقدم کیا۔ ایس ڈی ایف کے انخلا کے بعد شہر میں صورتحال نسبتاً پُرسکون بتائی جا رہی ہے۔